ՏԵՍԱՆՅՈՒԹ․ Նոր Զելանդիայում 23 մարդ անհետ կորել է արևադարձային ցիկլոնի ժամանակ

Նոր Զելանդիայի ոստիկանությունը չի կարողացել գտնել 23 անհետ կորածներին ամպրոպի և ջրհեղեղի ժամանակ, որն առաջացել է արևադարձային «Գաբրիել» ցիկլոնի պատճառով: Այս մասին ուրբաթ հայտնել է ոստիկանությունը։

«Ոստիկանության համար առաջնահերթություն է մնում 23 անհետ կորածների հետ կապի հաստատումը, և մենք աշխատում ենք հնարավորինս արագ՝ օգտագործելով մի շարք տարբեր մեթոդներ»,- ասված է հաղորդագրությունում։

«Անցած 1 օրվա ընթացքում ոստիկանությունը կանխարգելիչ 443 միջոցառում է իրականացրել, այս ընթացքում ստացել ենք 526 ահազանգ, որից 15-ը՝ գողության և 2-ը՝ ավտոմեքենայի գողության, տարբեր իրավախախտումների համար ձերբակալվել է 13 անձ»,– մանրամասնում են իրավապահները։

Նոր Զելանդիայի Հյուսիսային կղզուն հարվածած «Գաբրիելը» լայնածավալ ջրհեղեղների և սողանքների պատճառ է դարձել նրա կենտրոնական և հարավ-արևելյան շրջաններում։ 

Զոհվել է 11 մարդ, եւս 23-ը անհետ կորել են։ Հեղեղված բնակավայրերից տարհանվել է ավելի քան 10 հազար մարդ, որոշ բնակավայրեր զրկվել են մատակարարումից, կղզու մոտ 250 հազար բնակիչ մի քանի օր մնացել է առանց էլեկտրականության և կապի։