9 երկրների դեսպաններ կանչվել են Թուրքիայի ԱԳՆ

Թուրքիայի ԱԳՆ են կանչվել 9 երկրների դեսպաններ, այդ թվում՝այն երկրներինը, որոնց հյուպատոսությունները Ստամբուլում դադարեցրել են այցելուների ընդունելությունը: Այս մասին հայտնում է РИА Новости-ն՝ հղում անելով TRT Haber պետական հեռուստաալիքին։ 

Գործակալությունը հիշեցրել է, որ ավելի վաղ Ստամբուլում Ֆրանսիայի, Շվեդիայի, Նիդեռլանդների, Մեծ Բրիտանիայի, Շվեյցարիայի և Գերմանիայի գլխավոր հյուպատոսությունները հայտարարել էին, որ դադարեցրել են այցելուներ ընդունել քաղաքի կենտրոնում ահաբեկչությունների սպառնալիքի պատճառով: Թուրքիայի ներքին գործերի նախարար Սուլեյման Սոյլուն հինգշաբթի «հոգեբանական պատերազմ» է անվանել երկրի դեմ մի շարք եվրոպական երկրների կողմից Ստամբուլում իրենց հյուպատոսությունների փակումը: 

Ավելի վաղ ԱՄՆ դեսպանատունը երկուշաբթի նախազգուշացրել էր իր քաղաքացիներին Ստամբուլի կենտրոնում ահաբեկչությունների վտանգի մասին: Ըստ նախազգուշացման` թիրախ կարող են դառնալ եկեղեցիները, սինագոգները, Ստամբուլում դիվանագիտական առաքելությունները կամ օտարերկրացիների շրջանում սիրված այլ վայրեր: