«Մարդասիրական աղետի» մասին հայտարարությունները անհիմն են. Բայրամով

Ադրբեջանի արտգործնախարար Ջեյհուն Բայրամովը ԱՄՆ պետքարտուղարի օգնականի հետ հեռախոսազրույցում հայտարարել է.

«Ադրբեջանի կողմից Լաչինի ճանապարհի ենթադրյալ փակման հետևանքով Արցախի հայ բնակիչների շրջափակման և տարածաշրջանում «մարդասիրական աղետի» մասին հայտարարությունները բացարձակապես անհիմն են»: 

Նրա խոսքով, չնայած հետհակամարտային շրջանում ադրբեջանա-հայկական հարաբերությունների կարգավորման հետ կապված ադրբեջանական կողմի մի շարք կառուցողական նախաձեռնություններին, գործընթացը մշտապես ընդհատվում է Հայաստանի կողմից տարբեր սադրանքներով։

Բայրամովը հայտնել է, որ այս ճանապարհով ամեն օր անցնում են Կարմիր խաչի միջազգային կոմիտեի, ռուսական խաղաղապահ կոնտինգենտի մեծ թվով մեքենաներ և մարդասիրական այլ մեքենաներ։

Թեև Ադրբեջանի արտգործնախարարը նշում է, որ «մարդասիրական աղետի» մասին հայտարարությունները անհիմն են, Արցախում ամեն օր դատարկվում են խանութները, մարդիկ ուտելիքը ստանում են կտրոններով: Ադրբեջանի ղեկավարն էլ երեկ ասուլիսի ժամանակ ասել է, որ Արցախի բնակիչների համար ճանապարհը բաց է, միայն եթե նրանք ուզում են հեռանալ: 

«Նրանք կարող են ինքնուրույն հեռանալ, ոչ ոք նրանց չի խանգարի, կամ կարող են հեռանալ խաղաղապահների բեռնատարների օգնությամբ, կամ  ավտոբուսով»-նշել է Ալիևը։