Ուկրաինայի արտաքին գործերի նախարար Դմիտրի Կուլեբան The Wall Street Journal-ին (WSJ) տված հարցազրույցում ասել է, որ ԱՄՆ-ն չի արգելում ամերիկյան զենքի օգտագործումը Ղրիմի դեմ։ Նախարարը նշել է, որ Ուկրաինան չի համաձայնի խաղաղ համաձայնագրի, եթե Ղրիմն ու Դոնբասը մնան Ռուսաստանի վերահսկողության տակ։

Պարոն Կուլեբայի խոսքով՝ Ղրիմը «միջազգայնորեն ճանաչված է որպես ուկրաինական տարածք»։ «Ուկրաինան կվերցնի իր բոլոր տարածքները, այդ թվում՝ Ղրիմը, մի մասը ռազմական ճանապարհով, մյուսը՝ դիվանագիտական ​​ճանապարհով»,- վստահ է արտգործնախարարը։

Դմիտրի Կուլեբան միջազգային հանրությանը կոչ է արել չվախենալ, որ «Ռուսաստանը կքանդվի»։ «Փոխանակ մտածելու, թե ինչպես օգնել Ռուսաստանին գոյատևել և դառնալ համաշխարհային հանրության նորմալ անդամ, ժամանակն է ընդունել այն փաստը, որ այս Ռուսաստանը չի կարող լինել համաշխարհային հանրության նորմալ անդամ»,- ասաց նա։

Հուլիսին ԱՄՆ-ի ազգային անվտանգության հարցերով խորհրդական Ջեյք Սալիվանն ասել էր, որ Սպիտակ տունը մտադիր չէ Ուկրաինային մատակարարել ATACMS հրթիռներ, որոնք ունեն մոտ 300 կմ հեռահարություն: WSJ-ի աղբյուրները հայտնել են, որ դա պայմանավորված է ԱՄՆ իշխանությունների միջև Ղրիմի վրա հնարավոր հարվածների վերաբերյալ տարաձայնություններով։ ԱՄՆ-ը նաև փոփոխել է HIMARS ռեակտիվ համակարգերի շարքը՝ նախքան Ուկրաինա ուղարկելը։