«Անհրաժեշտ է ստորագրել Հայաստանին օգնություն տրամադրելու ՀԱՊԿ որոշման նախագիծը». Զաս

Անհրաժեշտ է ստորագրել Հայաստանին օգնություն տրամադրելու միջոցառումների մասին ՀԱՊԿ Հավաքական անվտանգության խորհրդի որոշման նախագիծը։ Այս մասին Մոսկվայում ՀԱՊԿ Խորհրդարանական վեհաժողովի նիստում հայտարարել է գլխավոր քարտուղար Ստանիսլավ Զասը։

Զասը հիշեցրել է, որ պետությունների ղեկավարների հանձնարարությամբ Հայաստանում մշակվել է դիտորդական առաքելություն՝ գլխավոր քարտուղարի և ՀԱՊԿ օպերատիվ շտաբի ղեկավարի գլխավորությամբ։ Այս աշխատանքի արդյունքում պատրաստվել է Հավաքական անվտանգության խորհրդի որոշման նախագիծ Հայաստանին օգնություն ցուցաբերելու համատեղ միջոցառումների մասին, որը քննարկվել է խորհրդի նոյեմբերի 23-ի նիստում։

«ՀԱՊԿ երկրների տարբեր դիրքորոշումների պատճառով հնարավոր չեղավ ընդունել այս նախագիծը։ Հուսով եմ, որ որոշակի վերանայումից հետո կհասնենք դրա ստորագրմանը և այդ միջոցների ընդունմանը։ Վստահ եմ, որ դա անհրաժեշտ է, այդ թվում՝ Հայաստանի համար»,- ասել է գլխավոր քարտուղարը։

Հիշեցնենք, որ նոյեմբերի 23-ին Երևանում անցկացվեց ՀԱՊԿ երկրների ղեկավարների մասնակցությամբ գագաթնաժողովը, որի ընթացքում հնարավոր չեղավ ստորագրել երկու փաստաթուղթ՝ հռչակագիր և հայտարարություն Հայաստանին օգնություն ցուցաբերելու մասին։ Այս առնչությամբ Հայաստանի վարչապետը հայտարարել էր, որ հրաժարվել է ստորագրել փաստաթուղթը կազմակերպության կողմից ադրբեջանական ագրեսիային քաղաքական գնահատական տալուց հրաժարվելու պատճառով։