ՏԵՍԱՆՅՈՒԹ․ Հայ գերիների խոշտանգման վերաբերյալ երեկ տարածված տեսանյութը նոր է․ մանրամասներ

Հայ գերիներին խոշտանգելու վերաբերյալ երեկ տարածված տեսանյութը նոր է։ Տեսանյութում երևացող երեք զինծառայողների ինքնությունը հայտնի է, տեղանքը՝ նույնականացված։ ՄԻԵԴ-ում հայ ռազմագերիների իրավունքների պաշտպանությամբ զբաղվող իրավապաշտպան Սիրանուշ Սահակյանը 

«Փաստինֆո»-ի հետ զրույցում հայտնել է, որ եղել է տեղեկատվություն՝ գերեվարման վերաբերյալ, որից հետո հայկական կողմը ստացել է դիերը, որոնց ուսումնասիրությունը ավելի է խորացրել գերևարման ընթացքում սպանված լինելու կանխավարկածը։

«Այս տեսանյութը միանշանակ հաստատեց, որ ավելի մեծ թվով հայ ռազմագերիներ են գնդակահարվել»,- ընդգծել է Սիրանուշ Սահակյանը։
 

Այլ խոսքով՝ գործ ունենք գերիների հերթական արտադատական գնդակահարման դեպքի հետ, Սիրանուշ Սահակյանի գնահատմամբ, սա մեծ քաղաքականության մասն է և քանի դեռ պատժելիությունն ապահովված չէ որևէ բան չի կանխելու այդ հանցագործությունների կատարմանը, միակ տարբերակը պատժելիությունն է և կատարված հանցագործությունների համար հետևանքների առաջբերումը՝ պետության և ներգրավված զինծառայողների, հրամանատարների նկատմամբ։

«Քանի դեռ այս պատասխանատվության միջոցները վրա չեն հասել, մենք վարքի կամ քաղաքականության փոփոխություն չենք ունենա»,- նշել է Սիրանուշ Սահակյանը։

Դիտարկմանը, որ փաստացի հայ ռազմագերիներին դաժանաբար սպանում են և մարմինները հայկական կողմին փոխանցում որպես մարտի դաշտում զոհված զինծառայողի մարմին, արդյո՞ք մոտավոր տվյալներ կան, թե քանի նման դեպք կա, Սահակյանն արձագանքել է. «Այդպես էլ անում են։ Այստեղ պետք է կասկածների առաջացման պարագայում դեպքն ուսումնասիրել, այդ թվում՝ վնասվածքների առաջացման մեխանիզմը, որի միջոցով կարելի է պարզել՝ մարտի դաշտում զոհված լինելը հրազենային վնասումից, թե ֆիզիկական հսկողության տակ գնդակահարված լինելը։ Այստեղ հանգամանալից բժշկական զննությունների և փորձաքննությունների անհրաժեշտություն կլինի»։

Հիշեցնենք, որ երեկ համացանցի ադրբեջանական տիրույթում տարածվել էր ադրբեջանցիների վայրագությունները վկայող հերթական տեսանյութը, ընդ որում, տեսանյութը տարածվել է դիտավորյալ՝ նախապես փակելով ռազմական հանցագործություններ կատարող ադրբեջանցիների դեմքերը՝ հետագայում դրանց նույնականացումից խուսափելու համար։ Տեսանյութում երևում է, թե ինչպես են ադրբեջանցի զինվորականները խոշտանգում հայ զինծառայողներին։ Դեպքը վերաբերում է ադրբեջանական սեպտեմբերյան ագրեսիային։ ՀՀ ՊՆ-ից «Փաստինֆո»-ի հետ զրույցում հայտնել էին, որ տեսանյութն ուսումնասիրվում է։

Միջազգային իրավական հարցերով ՀՀ ներկայացուցիչությունից այսօր «Փաստինֆո»-ի հետ զրույցում հայտնեցին, որ տեսանյութին ծանոթ են, այն կուղարկվի ՄԻԵԴ և Արդարադատության միջազգային դատարան։ Ներկայացուցչությունից ևս փաստեցին, որ տեսանյութում երևացող զինծառայողները, ինչպես նաև՝ տեղանքը նույնականացված են, կադրերում երևում է, որ զինծառայողները ողջ են և վիրավոր, սակայն զինծառայողներին սպանված են վերադարձրել։

ՀՀ գլխավոր դատախազությունից «Փաստինֆո»-ի հետ զրույցում հայտնեցին, որ Գլխավոր դատախազությունում ուսումնասիրվում են մամուլի հրապարակումները: