ՌԴ ՊՆ-ն` Զապորոժիեի ատոմակայանին հասցված հարվածների մասին

 «Օգոստոսի 7-ին Զելենսկու ռեժիմը միջուկային նոր ահաբեկչություն կատարեց Զապորոժիեի ԱԷԿ-ի էներգետիկ ենթակառուցվածքային օբյեկտներում՝ Խերսոնի և Զապորոժիեի շրջաններում հումանիտար աղետ ստեղծելու նպատակով»: РИА новости-ի հաղորդմամբ` այս մասին հայտարարություն է տարածել Ռուսաստանի ՊՆ-ն:

«Մոտ 12 ժամ 40 րոպե 44-րդ հրետանային բրիգադի ուկրաինական ստորաբաժանումները Կախովկայի ջրամբարի հակառակ ափին գտնվող Մարգանեց բնակավայրի տարածքից գնդակոծել են Զապորոժյեի ատոմակայանը: Ուկրաինական գնդակոծության հետևանքով վնասվել է Կախովսկայա բարձրավոլտ գիծը, որը էլեկտրաէներգիա է մատակարարել Զապորոժիեի և Խերսոնի շրջաններին»,- մասնավորապես հայտնել է ՌԴ ՊՆ-ն:

Հիշեցնենք, որ  Զապորոժիեի ատոմակայանը արդեն ավելի քան երեք ամիս գտնվում է ռուսների վերահսկողության ներքո, բայց ուկրաինական կողմը պնդում է, որ հարակից գյուղերից ռուսական ուժերը հրետակոծում են ատոմակայանի տարածքը՝ միջուկային աղետի սպառնալիքի մեղքը Ուկրաինայի վրա բարդելու նպատակով։