Մետրոյի բոլոր կայարաններից տարհանում է իրականացվել. ինչ է կատարվում

Մետրոյի բոլոր կայարաններից տարհանում է իրականացվել, բոլոր մարդիկ դուրս են բերվել: Մետրոն անժամկետ փակ է, մինչև հասկանալի դառնա, թե ինչ է կատարվում: Այս մասին Auroranews.am -ի հետ զրույցում հայտնել է Մետրոպոլիտենի մամուլի խոսնակ Տաթև Խաչատրյանը:

Հիշեցնենք, որ այսօր՝ ժամը 18։59-ին, Ճգնաժամային կառավարման ազգային կենտրոն տեղեկություն է ստացվել, որ Երևանի քաղաքապետարանում, մետրոպոլիտենի բոլոր կայարաններում, Զվարթնոց միջազգային օդանավակայանում, Բաղրամյան 19 հասցեում, ինչպես նաև զինվորական և քաղաքացիական բոլոր կարևորագույն օբյեկտներում պայթուցիկ սարքեր են տեղադրված։

ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից մեկական մարտական հաշվարկ մեկնել է վերոնշյալ հասցեներով։

Զվարթնոց միջազգային օդանավակայան է մեկնել նաև Փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի կինոլոգիական խումբը, իսկ Բաղրամյան 19 հասցե՝ քաղաքացիական պաշտպանության վարչության քաղաքացիական պաշտպանության ուժերի հավաքական կենտրոնի ինժեներասակրավորական խումբը։