ԶԳՈՒՇԱՑՈՒՄ. Զանգում են, ներկայանում որպես բանկի աշխատակից ու պահանջում նշել քարտի տվյալները
Յունիբանկը զգուշացնում է, որ ակտիվացել են քարտային զեղծարարության դեպքերը: Զեղծարարները զանգահարում են քարտապաններին, ներկայանում որպես բանկի աշխատակից և պահանջում նշել քարտի բոլոր տվյալները, այդ թվում՝ PIN-կոդը, վավերականության ժամկետը, CVV/CVC կոդը:
«Մի՛ տրամադրեք անձնական տվյալներն ու քարտի վավերապայմաններն այլ անձանց, անգամ եթե դիմող անձը ներկայացել է որպես ձեզ սպասարկող բանկի աշխատակից:
Կասկածելի միջադեպերի դեպքում անհրաժեշտ է անձամբ դիմել բանկ քարտի վրա նշված հեռախոսահամարներով՝ ճշտելու համար, թե արդյո՞ք գործ ունեք բանկի իրական աշխատակցի հետ»,-ասվում է բանկի հրապարակած հաղորդագրության մեջ:
Բանկը հիշեցնում է նաև, որ իրենք ունեն քարտապանների սպասարկման շուրջօրյա ծառայություն, որին կարող եք դիմել քարտի հետ կապված ցանկացած հարցով:
