ՏԵՍԱՆՅՈՒԹ․ «FlyOne Armenia»-ի չվերթը չեղարկվել է օդանավի հրամանատարի որոշմամբ․ ի՞նչ խնդիր է ունեցել ինքնաթիռը
«FlyOne Armenia»-ի Երևան-Ստամբուլ-Երևան չվերթը երեկ չեղարկվել է:
Երևանի ավագանու նախկին անդամ Գրիգոր Երիցյանը ֆեյսբուքյան իր էջում գրել է․
«Ավելի քան 100 ուղևորներով բեռնված ինքնաթիռը տեխնիկական պատճառներով չի կարողացել օդ բարձրանալ։ Թռիչքի անհաջող փորձից հետո մենք իջանք ինքնաթիռից և 3 ժամ առանց տեղեկատվության։
Ուղևորները վախենում են նորից նստել նույն ինքնաթիռը, տեղում ընկերության մեկ ներկայացուցիչ չկա, այլընտրանքային թռիչքներ և փոխհատուցում չեն առաջարկում»,-գրել է Երիցյանը։
Ավելի ուշ միջադեպին ֆեյսբուքյան ուղիղ եթերում արձագանքել է ավիաընկերության խորհրդի նախագահ Արամ Անանյանը և պարզաբանել, որ չվերթը չեղարկվել է օդանավի հրամանատարի որոշմամբ.
«Օդանավի հրամանատարը, տեսնելով որոշակի տարբերություններ օդանավի տվյալների տվիչների մեջ, որոշել է դադարեցնել չվերթը։ Կարծում ենք` դա ճիշտ և հիմնավորված որոշում է։ Տեղի ունեցածի վերաբերյալ իրազեկվել են ՀՀ ավիացիոն իշխանությունները, և մի քանի ժամ անց չվերթը տեղի կունենա, մեր բոլոր ուղևորները կհասնեն այն վայրերը, որտեղ նախատեսել էին մեկնել»,- ասել է Անանյանը։
Auroranews-ը փորձեց կապ հաստատել ավիաընկերություն՝ հասկանալու, թե կոնկրետ ինչ խնդիրներ է ունեցել ինքնաթիռը և ինչ պատասխան են ստացել ուղևորները, սակայն մեր զանգերը մինչև այս պահը անպատասխան են մնացել։
