Չինաստանի ԱԳՆ-ն մեկնաբանել է Սի Ցզինպինի՝ Ռուսաստան այցելելուց հրաժարվելու մասին լուրերը
Ռուսաստանի և Չինաստանի ղեկավարները սերտ շփումներ են պահպանել համաճարակի սկզբից ի վեր, և երկու երկրները կշարունակեն զարգացնել շփումները բոլոր մակարդակներում, չորեքշաբթի ճեպազրույցում ասաց Չինաստանի ԱԳՆ խոսնակ Չժաո Լիջյանը։
Ավելի վաղ ԶԼՄ-ները հայտնել էին, որ Չինաստանի ղեկավարն իբր մերժել է ՌԴ նախագահ Վլադիմիր Պուտինի՝ Ռուսաստան այցելելու հրավերը՝ կորոնավիրուսի համաճարակի պատճառով։
«COVID-19 համաճարակի սկզբից ի վեր Չինաստանի և Ռուսաստանի պետությունների ղեկավարները և բարձրաստիճան պաշտոնյաները սերտ կապ են պահպանել տարբեր միջոցներով և արդյունավետ հաղորդակցություն են իրականացրել երկկողմ հարաբերությունների և տարբեր ոլորտներում համագործակցության վերաբերյալ»,- ասել է չինացի դիվանագետը։
Չժաո Լիջյանն ընդգծել է, որ կողմերը «կշարունակեն զարգացնել փոխանակումները բոլոր մակարդակներում» և համապարփակ գործընկերության և ռազմավարական փոխգործակցության հարաբերությունները:
Ռուսաստանի Դաշնության նախագահի մամուլի քարտուղար Դմիտրի Պեսկովն ավելի վաղ հայտարարել էր, որ ԶԼՄ-ների հաղորդագրությունները Սի Ցզինպինի՝ Ռուսաստան գալուց հրաժարվելու մասին «ամբողջովին չեն համապատասխանում իրականությանը»։
