Ուկրաինայից հայտնել են` քանի միլիարդ դոլար է կազմում երկրի ենթակառուցվածքներին հասցված վնասը
Ուկրաինայի ենթակառուցվածքների նախարար Ալեքսանդր Կուբրակովը հայտնել է, որ Ուկրաինայում ռազմական գործողությունների հետևանքով երկրի ենթակառուցվածքներին հասցված վնասը հասնում է 95 միլիարդ դոլարի։
Տեղեկատվությունը հայտնում է «ՌԻԱ Նովոստի»-ն:
«Այժմ մեր բյուջեն գրեթե 100%-ով ուղղվում է ռազմական և սոցիալական նպաստների կարիքներին: Եվ ամեն ամիս մենք ունենում ենք 5 միլիարդ դոլարի դեֆիցիտ: Ենթակառուցվածքներին հասցված վնասն արդեն հասնում է 95 միլիարդ դոլարի», - ասել է Կուբրակովը։
Վերջինս նաև նշել է, որ վերջին երեք ամիսների ընթացքում սահմանային անցակետերում բացվել է 43 ժամանակավոր անցման կետ, վերականգնվել է 13 երկաթուղային կամուրջ և անցում, մաքրվել է ավելի քան հազար կիլոմետր ճանապարհ։
«Պետության և բիզնեսի ջանքերի շնորհիվ արդեն իսկ հնարավոր է դարձել Դանուբի նավահանգիստներում բեռնափոխադրումները մեծացնել շուրջ 4 անգամ: Մենք լոգիստիկա ենք կառուցում արևմտյան սահմաններին, և արդեն կարելի է խոսել բեռնափոխադրումների ավելացման մասին»,- ասել է Ուկրաինայի ենթակառուցվածքների նախարարը։
