Բաքվից հայտարարել են հայ-ադրբեջանական բանակցությունները ձգձգելու ռիսկերի մասին

Ռուսաստանի և Ադրբեջանի արտգործնախարարներ Սերգեյ Լավրովն ու Ջեյհուն Բայրամովը բանակցությունների ընթացքում քննարկել են Հարավային Կովկասում հետկոնֆլիկտային կարգավորման հարցը:

Լավրովը հայտարարել է, որ ադրբեջանցի գործընկերոջ հետ չի քննարկել ԵԱՀԿ Մինսկի խմբի գործունեությունը:

«ԵԱՀԿ ՄԽ-ն դադարեցրել է իր գործունեությունը ԱՄՆ-ի և Ֆրանսիայի նախաձեռնությամբ»,- ասել է նա Բայրամովի հետ ճեպազրույցում:

ՌԴ արտգործնախարարը նշել է, որ քննարկվել են հետկոնֆլիկտային կարգավորման գործընթացները, որի հիմքում երեք եռակողմ հայտարարություններն են:

Ադրբեջանի ԱԳՆ ղեկավար Ջեյհուն Բայրամովն էլ հայտարարել է, որ պատերազմից հետո ԵԱՀԿ ՄԽ համանախագահներին առաջարկվել է նոր գնահատական տալ իրավիճակին՝ հաշվի առնելով, որ Մադրիդյան սկզբունքներում նախատեսված բոլոր տարրերն արդեն իրագործվել են: Սակայն, նրա խոսքով, նույնիսկ պատերազմից մեկ տարի անց Բաքուն որևէ գործնական առաջարկ չի ստացել նրանցից, իսկ 2022 թվականի փետրվարից համանախագահների ձևաչափը կաթվածահար է եղել հայտնի պատճառներով։

«Ադրբեջանական կողմի համար առաջնահերթությունը Հայաստանի հետ հարաբերությունների կարգավորումն է և տարածաշրջանում կայուն խաղաղության հասնելը։ Բանակցային գործընթացը չի կարող ձևաչափի պատանդ լինել»,– հայտարարել է Բայրամովը:

Բռնապետական երկրի նախարարը ներկայացրել է Բաքվի դիրքորոշումը` ղարաբաղյան հակամարտությունը մնացել է անցյալում, և կայուն խաղաղության համար պետք է համագործակցել։

«Եռակողմ համաձայնագրերը պետք է լիարժեքորեն և անշեղորեն կատարվեն։ Բանակցային գործընթացի արհեստական ձգձգումը լուրջ ռիսկեր է պարունակում», - ասել է նա։