Հուսով ենք՝ Բրյուսելը կօգնի իրականացնելու ԼՂ-ի շուրջ եռակողմ համաձայնագրերը. Զախարովա

Մոսկվան ակնկալում է, որ Բրյուսելը կօգնի իրականացնել Լեռնային Ղարաբաղի շուրջ եռակողմ պայմանավորվածությունները, այլ ոչ թե աշխարհաքաղաքական խաղեր խաղալ: Այս մասին ասել է ՌԴ ԱԳՆ խոսնակ Մարիա Զախարովան՝ անդրադառնալով Արցախի հարցի կարգավորման հարցում ԵՄ միջնորդությանը։
 

«Ռուսաստանի ռազմավարական նպատակն այն է, որ Հարավային Կովկասը դառնա կայունության և բարգավաճման գոտի, ինչպես նաև նպաստել այդ գործընթացին: Երևանի և Բաքվի միջև հարաբերությունների համալիր կարգավորումը առանցքային խնդիրներից մեկն է...: Ռուսաստանը համապարփակ աջակցություն է ցույց տալիս Երևանի և Բաքվի գործընկերներին բոլոր ուղիներով, ներառյալ՝ տրանսպորտային կապերի ապաշրջափակումը, սահմանների սահմանազատումը, հանրային երկխոսության հաստատումը»,- ասել է նա:

Բացի դա, Զախարովան նշել է, որ ռուսական կողմը տեսնում է ամենաբարձր մակարդակով պայմանավորվածությունների կատարման գործընթացին ԵՄ-ի միջամտելու համառ փորձերը։ 

«Հուսով ենք, որ Բրյուսելը, եթե ցանկանա, կօգնի դրանք իրականացնել, այլ ոչ թե աշխարհաքաղաքական խաղեր խաղալ»,- ասել է Զախարովան։