Այս ձևաչափի «մահվան» մասին լուրերը փոքր-ինչ չափազանցված են. Միրզոյան
Ուկրաինական պատերազմի բերումով ԵԱՀԿ Մինսկի խմբի համանախագահության աշխատանքները, մեղմ ասած, ակտիվ չեն ընթանում, ԱԺ-կառավարություն հարցուպատասխանի ժամանակ ասաց ՀՀ արտգործնախարար Արարատ Միրզոյանը։
«Ուկրաինական պատերազմից հետո համանախագահների շրջանում որոշակի տարակարծություններ կան։ Բայց մենք շարունակում ենք ԼՂ հիմնախնդրի բանակցությունների տեղը և ձևաչափը տեսնել ԵԱՀԿ Մինսկի խմբի համանախագահությունում։
Այս մասին մենք շարունակաբար խոսում ենք բոլոր միջազգային գործընկերների և առաջին հերթին՝ համանախագահների հետ։ Ուրախությամբ պետք է փաստեմ, որ վերջերս համանախագահ երկրները վերահաստատում են իրենց հանձնառությունը հենց այդ ձևաչափում աշխատանքները շարունակելու», - ասաց ՀՀ արտգործնախարարը։
Արարատ Միրզոյանի խոսքով՝ ԵԱՀԿ Մինսկի խմբի համանախագահության կոնսենսուսի մասին խոսելը չափազանցություն կլինի, բայց այս ձևաչափի «մահվան» մասին լուրերը ևս փոքր-ինչ չափազանցված են։
