ԱԻ նախարար Անդրանիկ Փիլոյանը` կոռուպցիոն սկանդալի կենտրոնում. վարչապետը նրան արձակուրդ է ուղարկել

ՀՀ վարչապետ Նիկոլ Փաշինյանն արձակուրդ է ուղարկել ՀՀ արտակարգ իրավիճակների նախարար Անդրանիկ Փիլոյանին, որը հայտնվել է իրավապահների ուշադրության կենտրոնում: Մամուլում մարտի 28-ին տեղեկություն տարածվեց, որ ԱԱԾ-ն խուզարկություն է իրականացրել ԱԻՆ-ում: 

«Փաստինֆո»-ի տեղեկություններով` խուզարկությունը կատարվել է Հակակոռուպցիոն կոմիտեում քննվող քրեական գործի շրջանակներում, ընդ որում` թիրախում եղել է նախարարի խորհրդականի աշխատասենյակը: Մեզ հաջողվեց պարզել, որ քրեական գործում շոշափվում է հենց նախարարի անունը: Պարզվում է, որ նա առանց մրցույթի սուրճի ապարատները տարել նախարարություն, շինանյութ ձեռք բերել, բայց դրանով իր անձնական կարիքները հոգացել: Բացի այդ` որոշակի խնդիրներ կան նաեւ պարգեւավճարների հետ կապված: Պարզվում է` ոչ բոլոր պարգեւատրվածներն են կարողացել ամբողջությամբ տնօրինել իրենց գումարները, թե ում ինչքան է բաժին հասել` պարզում է հակակոռուպցիոն կոմիտեն: 

Լրատվամիջոցի հաղորդմամբ` Նիկոլ Փաշինյանը կոռուպցիոն սկանդալում հայտնված նախարարին որոշել է արձակուրդ ուղարկել մարտի 28-ից մինչեւ ապրիլի 14-ը ներառյալ: