Խոշոր ավտովթար՝ Կոտայքի մարզում․ կան վիրավորներ

Երեկ՝ մարտի 27-ին, ավտովթար է տեղի ունեցել Կոտայքի մարզում։ Ժամը 20։00-ի սահմաններում Նոր Գեղի-Աշտարակ ավտոճանապարհի 8-րդ կմ հատվածում բախվել են Արագածոտնի մարզի բնակիչ՝ 31-ամյա Վարդան Գրիգորյանի վարած Opel Zafira մակնիշի և Կոտայքի մարզի բնակիչ Կարեն Տոնոյանի վարած ՎԱԶ 2112 մակնիշի ավտոմեքենաները։

Ինչպես հայտնում է shamshyan.com-ը, վթարի հետևանքով Կ. Տոնոյանն ու նրա ուղևոր՝ Կոտայքի մարզի բնակիչ, 21-ամյա Էլեն Հարությունյանը մարմնական վնասվածքներով տեղափոխվել են Եղվարդ քաղաքի բժշկական կենտրոն։ 

Բախման հետևանքով ավտոմեքենաները դուրս են եկել երթևեկելի գոտուց, բախվել գազատար խողովակին։ Փրկարարները հոսանքազրկել են ավտոմեքենաները, փակել գազաբալոնների փականներն ու տուժածներին մոտեցրել շտապօգնության ավտոմեքենային։