Լեհաստանի վարչապետը ծրագիր է ներկայացրել պատերազմը դադարեցնելու համար
Լեհաստանը, Սլովենիան եւ Չեխիան 10 կետից բաղկացած ծրագիր են պատրաստել՝ Ուկրաինային աջակցելու եւ պատերազմը դադարեցնելու համար։ Այս մասին գրել է Լեհաստանի վարչապետ Մատեուշ Մորավեցկին Politico-ի հոդվածում։
«Առաջին հերթին, մենք պետք է անջատենք բոլոր ռուսական բանկերը SWIFT միջազգային վճարային համակարգից։ Հակառակ դեպքում Ռուսաստանի տնտեսությունը մի քանի շաբաթվա ընթացքում կհարմարվի նոր պայմաններին։
Երկրորդ՝ մենք պետք է ապաստան տրամադրենք ռուս զինվորականներին, որոնք հրաժարվում են ծառայել Մոսկվայի հանցավոր ռեժիմին։
Երրորդ՝ մենք պետք է ամբողջությամբ դադարեցնենք ռուսական քարոզչությունը Եվրոպայում։ Խոսքի ազատությունը չի նշանակում ստելու իրավունք։
Չորրորդ՝ մենք պետք է արգելափակենք ռուսական նավերը մեր նավահանգիստներում։
Հինգերորդ՝ անհրաժեշտ է ներդնել ճանապարհային տրանսպորտի նույն շրջափակումը Ռուսաստանից եւ դեպի Ռուսաստան։
Վեցերորդ՝ մենք պետք է պատժամիջոցներ կիրառենք ոչ միայն ռուս օլիգարխների, այլեւ ողջ բիզնես միջավայրի նկատմամբ։
Յոթերորդ՝ մենք պետք է կասեցնենք վիզաների տրամադրումը Ռուսաստանի բոլոր քաղաքացիների համար, որոնք ցանկանում են մուտք գործել ԵՄ։
Ութերորդ՝ մենք պետք է պատժամիջոցներ սահմանենք «Եդինայա Ռոսիա» կուսակցության բոլոր անդամների նկատմամբ։
Իններորդ՝ մենք պետք է ամբողջությամբ արգելենք Ռուսաստան արտահանել տեխնոլոգիաներ, որոնք կարող են օգտագործվել ռազմական նպատակներով։
Եվ տասներորդ՝ մենք պետք է բացառենք Ռուսաստանը բոլոր միջազգային կազմակերպություններից։ Մենք չենք կարող հանցագործների հետ նույն սեղանի շուրջ նստել։
Եթե սա չդադարեցնի պատերազմը, ապա պետք է առաջ շարժվել։ Կիեւում մենք առաջարկել ենք խաղաղապահ առաքելություն ստեղծել ՆԱՏՕ-ի եւ այլ միջազգային կազմակերպությունների հովանու ներքո։ Եթե մենք չկարողանանք արդյունավետ պատժամիջոցներ կիրառել, մենք այլընտրանք չունենք. մենք պետք է պաշտպանենք Ուկրաինայի ժողովրդին մեր վահաններով։
Եթե մենք ցանկանում ենք վերականգնել խաղաղությունը, Պուտինը պետք է իմանա, թե որտեղ է կարմիր գիծը,՝ այն գիծը, որը նա չի կարող անցնել։ Այն, որ Ռուսաստանը միջուկային զինանոց ունի, չի կարող արդարացնել պասիվությունը։ Մենք պետք է տեղյակ լինենք այդ սպառնալիքի մասին, բայց դա չի կարող մեզ հետ պահել։ Հակառակ դեպքում Պուտինը միայն ավելի հեռուն կգնա»,- կարծում է Մորավեցկին։
