Սև ծովում Ուկրաինայի տեղադրած ականները կարող են հասնել Բոսֆոր ու Միջերկրական ծով
Սև ծովի ափամերձ տարածքներում ուկրաինական զինուժի տեղադրած ականները կարող են հասնել մինչև Բոսֆորի նեղուց ու Միջերկրական ծով։ Նման հայտարարություն է արել Ռուսաստանի անվտանգության դաշնային ծառայությունը։
Ռուսական կողմը չի բացառել, որ ծովի հատակից պոկված ականները ջրի հոսանքով կարող են հասնել մինչև Բոսֆոր, այնտեղից էլ` Միջերկրածովյան ավազանի այլ ծովեր:
Ռուսական կողմի տեղեկություններով` Ուկրաինայի ռազմածովային ուժերը ռուսական հատուկ գործողության մեկնարկից ի վեր շուրջ 420 ական են տեղադրել Օդեսայի, Օչակովի, Չեռնոմորսկի և Յուժնի նավահանգիստների ծովային մատույցներում։
«Հաշվի առնելով, որ ուկրաինական թվարկված նավահանգիստների տարածքներում գերակշռում են հարավային մակերևութային հոսանքները, չի բացառվում ականների հոսքը դեպի Բոսֆոր և հետագայում Միջերկրական ծովի ավազանի ծովեր»,- ասվում է ԱԴԾ հաղորդագրության մեջ։
