ՏԵՍԱՆՅՈՒԹ. Զելենսկին կոչով դիմել է աշխարհին

 Ուկրաինայի նախագահ Վլադիմիր Զելենսկին կոչ է անում աշխարհին հրաժարվել ռուսական նավթից ու նավթամթերքից, ինչպես նաև ապրանքներ և ծառայություններ չմատակարարել Ռուսաստանի Դաշնություն: Նա կրկին շեշտում է` պետք է փակել Ուկրաինայի օդային տարածքը, պաշտպանել քաղաքացիական անձանց: Այս մասին նախագահը հայտնել է իր տեսաուղերձում

«Մենք արդեն 12 օր է, ինչ պաշտպանվում ենք ներխուժումից։ Մենք երբեք չենք ցանկացել այս պատերազմը, բայց այն պարտադրվեց մեզ։ Մենք  չենք երազել մարդ սպանել, բայց պետք է թշնամուն դուրս գցենք մեր հողից և մեր կյանքից: Եվրոպական այլ ազգ 80 տարի չի տեսել նման պատերազմ: Հենց մեր հողի վրա է որոշվում, թե արդյոք Եվրոպայում մեկ ուրիշը կդառնա՞ նույն ագրեսիայի զոհը, թե ոչ»,- ասել է նախագահը։

Զելենսկու խոսքով՝ նա այս հարցերը քննարկել է աշխարհի առաջնորդների հետ, նրանք համակարծիք են՝ Ուկրաինան որոշում է մայրցամաքի ապագան իր դիմադրությամբ, իսկ իր ընկերները՝ նրանց օգնությամբ։

Երկրի ղեկավարը նաև կոչ է արել բոյկոտել Ռուսաստանի Դաշնություն ապրանքների մատակարարումը։
«Եթե նրանք չեն կարողանում պահպանել քաղաքակիրթ կանոնները, ապա չպետք է ստանան նաև ապրանքներ և ծառայություններ է, թող պատերազմը կերակրի նրանց»,- ընդգծեց նա։
Զելենսկին ասել է, որ միջազգային հանրությունը պետք է էլ ավելի վճռական գործի։