Ստանիսլավ Զասը` հայ-ադրբեջանական սահմանին տիրող իրավիճակի մասին

Հավաքական անվտանգության պայմանագրի կազմակերպությունը սահմանագծում և սահմանազատում սկսելու` Հայաստանի և Ադրբեջանի որոշումը համարում է ներկա իրավիճակի կրկնությունը կանխելու կարևոր քայլ։ «Արմենպրեսին» տված հարցազրույցում այս մասին ասել է ՀԱՊԿ գլխավոր քարտուղար Ստանիսլավ Զասը։

Նա նշել է, որ իրենց շատ է մտահոգում լարված իրավիճակը հայ–ադրբեջանական սահմանին, որտեղ պարբերաբար տեղի են ունենում բախումներ և հրաձգություններ, որոնց հետևանքով մարդիկ են զոհվում։

Խոսելով ադրբեջանական ԶՈւ ներկայացուցիչների` Հայաստանի Հանրապետության տարածքում գտնվելու մասին, և թե ինչպես է ՀԱՊԿ–ը վերաբերվում այդ փաստին, Զասը հայտնել է, որ իրենք ուշադիր հետևում են իրավիճակին։

«Կարծում ենք, որ սահմանային վեճերը պետք է լուծվեն միայն քաղաքական և դիվանագիտական միջոցներով և աջակցում ենք այս տարվա նոյեմբերի 26-ի եռակողմ հայտարարությամբ ամրագրված համաձայնություններին։ Պետք է քայլեր ձեռնարկել հայ-ադրբեջանական սահմանին կայունության և անվտանգության մակարդակի բարձրացման, Հայաստանի և Ադրբեջանի միջև պետական սահմանի դելիմիտացիայի և այդուհետ դեմարկացիայի հարցերով՝ Ռուսաստանի Դաշնության աջակցությամբ երկկողմ հանձնաժողովի ստեղծման ուղղությամբ»,– ասել է Զասը։

Նրա կարծիքով` իրավիճակի ապաէսկալացիայի միջոցառումներն առավել քան երբևէ անհրաժեշտ են և առաջնահերթ նշանակություն ունեն։

ՀԱՊԿ գլխավոր քարտուղարը շեշտել է, որ իրենք սատարում են ՀՀ կառավարության քայլերը՝ ստեղծված իրավիճակը քաղաքական և դիվանագիտական ճանապարհով կարգավորելու ուղղությամբ, և դա միակ ելքն են համարում։

Զասն ընդգծել է, որ արժե ավելի ակտիվ օգտագործել ԵԱՀԿ Մինսկի խմբի համանախագահության հնարավորությունները։

Մեկնաբանելով Սյունիքում նոյեմբերի 16-ին տեղի ունեցած հարձակումները, Զասը նշել է, որ իրավիճակի սրումից հետո Հայաստան է գործուղվել ՀԱՊԿ օպերատիվ խումբ. իրադրության ուսումնասիրման, օպերատիվ պլանների հստակեցման և առաջարկությունների մշակման նպատակով` կազմակերպության միացյալ շտաբի պետի առաջին տեղակալ, գեներալ-լեյտենանտ Հասան Կալոևի գլխավորությամբ ուղարկվել է օպերատիվ խումբ, որի կազմում ներգրավված էին ՀԱՊԿ քարտուղարության և օպերատիվ շտաբի ներկայացուցիչներ։

Ինչ վերաբերում է ՀԱՊԿ-ի կողմից վճռական միջոցներ ձեռնարկելու` հայ պատգամավորների կոչերին, ապա, ըստ ՀԱՊԿ գլխավոր քարտուղարի, Երևանը շեշտը դրել է իրավիճակի լուծման այլ մեխանիզմների վրա:

Հիշեցնենք, որ Ստանիսլավ Զասը դեկտեմբերի 22-24-ը կայցելի Հայաստան` հանդիպելու երկրի բարձրագույն քաղաքական և ռազմական ղեկավարության հետ:

Այցի ընթացքում հանդիպում է նախատեսված ՀՀ վարչապետ Նիկոլ Փաշինյանի հետ, որն այս տարի ՀԱՊԿ Հավաքական անվտանգության խորհրդի նախագահն է: