Իրանից կրկին խոսել են Ադրբեջանի քայլերի մասին

Իրանի ԱԳՆ խոսնակ Սաեդ Խաթիբզադեն կոչ է արել Ադրբեջանին թույլ չտալ երրորդ երկրներին օգտագործել իրենց տարածքները և սահմանը: «Թասնիմ» գործակալության փոխանցմամբ՝ այս մասին ԱԳՆ ներկայացուցիչը հայտնել է երկուշաբթի կայացած ճեպազրույցի ժամանակ:

«Իրանը լավ գիտի՝ ինչպես պատշպանել իր անվտանգությունը, սակայն Ադրբեջանի համար ճիշտ քայլ կլիներ, որ պահպաներ իր ինքնիշխանությանն առնչվող պարտականությունները: Թեհրանը լավ հարաբերություններ ունի և՛ Բաքվի, և՛Երևանի հետ: Իրանի հարաբերությունները մի երկրի հետ չեն հակասում այլ երկրների հետ հարաբերություններին»,- հավելել է Խաթիբզադեն:

Անդրադառնալով Ադրբեջանի կողմից իրանցի վարորդների ձերբակալությանը՝ ԱԳՆ խոսնակը շեշտել է. «Իրանցի վարորդների նկատմամբ նման վերաբերմունքը չի համապատասխանում բարիդրացիական հարևանության սկզբունքներին»: 

«Ադրբեջանցի պաշտոնյաները պետք է ավելի ուշադիր լինեն Իրանի քաղաքացիների հանդեպ իրենց սահմանապահների վերաբերմունքի հարցում»,- հավելել է դիվանագետը:

 Հիշեցնենք, որ Ադրբեջանն արգելափափակել է երթևեկությունը Գորիս-Կապան ճանապարհի երկու հատվածում և այդ ճանապարհով բեռներ փոխադրող երկու իրանցի վարորդի է կալանավորել: