«Մակրոնը Հիտլերի կերպարում». այս պատկերը թանկ է արժեցել ֆրանսիացու համար

Ֆրանսիայի Տուլոն քաղաքի դատարանը 10 հազար եվրոյի չափով տուգանել է ակտիվիստին, որը գովազդային վահանակի վրա Էմանուել Մակրոնին պատկերել է Ադոլֆ Հիտլերի կերպարում, հայտնել է Euronews-ը: 

62-ամյա Միշել-Անժ Ֆլորին դատապարտվել է պետության ղեկավարին հրապարակայնորեն վիրավորելու համար: Դատավճռի կայացումից հետո տղամարդը հայտարարել է, որ մտադիր է բողոքարկել: Ակտիվիստը կարծում է, որ դատարանը խախտել է իր՝ ծաղրանկարի իրավունքը: 

«Չեմ կարողանում դրան հավատալ», - գրել է նա Twitter-ում: «Ծաղրանկարի իրավունքը հուղարկավորվեց Տուլոնում»: 

Ֆլորիի փաստաբան Բերանժե Տուրնեն ասել է, որ «նախագահը, որն այդքան բուռն կերպով պաշտպանում է խոսքի ազատությունը, կարծում է, որ այդ ազատությունն ավարտվում է իր անձով»: 

Ֆրանսիայի նախագահ Մակրոնը դատի է տվել Ֆլորիին հուլիսի վերջին, երբ Տուլոնի փողոցներում ցուցադրվել է գովազդային վահանակ, որտեղ երկրի ղեկավարը պատկերված է եղել Հիտլերի կերպարում: Նացիստական ​​բանակի համազգեստով քաղաքական գործչի պատկերի աջ կողմում Երրորդ Ռեյխի դրոշի ֆոնին գրություն է եղել. «Հնազանդվիր: Պատվաստվիր»: Այսպիսով, պաստառի հեղինակը դեմ է արտահայտվել երկրում կարանտինի խստացմանը: