Պետք է անվերապահորեն աջակցել ԶՈՒ-ին, սակայն սա որևէ կերպ չի ենթադրում քաղաքական ակնկալիքներ ունենալ բանակից. Քոչարյան

ԱԺ Պաշտպանության և անվտանգության հարցերի հանձնաժողովի նախագահի թեկնածու Անդրանիկ Քոչարյանը ԱԺ-ում ներկայացրեց, թե իր ընտրվելու դեպքում որոնք են լինելու հանձնաժողովի հիմնական անելիքները։ Քոչարյանը դրանցից մեկը համարեց բանակը քաղաքականությունից հեռու պահելը։

«Թե՛ ԱԺ-ը, թե՛ կառավարությունը, թե՛ հանձնաժողովը հսկայական անելիք ունեն բանակը ցանկացած գնով քաղաքականությունից հեռու պահելու ուղղությամբ։ Պետք է անվերապահորեն աջակցել ԶՈՒ-ին, սակայն սա որևէ կերպ չի ենթադրում քաղաքական ակնկալիքներ ունենալ բանակից», - ասաց նա։

Քոչարյանը ԱԺ Պաշտպանության և անվտանգության հարցերի հանձնաժողովի գլխավոր առաջնահերթություններից համարեց նաև ԶՈՒ-ում կոռուպցիայի դեմ արդյունավետ պայքարի գործիքակազմի մշակումը, անդրադարձավ նաև երկրի անվտանգության համակարգը վերականգնելու խնդրին։

«Այս պահին յուրաքանչյուրիս պարտականությունը պետք է լինի մեր երկրում անվտանգության համակարգի ամբողջական վերականգնումը, բանակի հզորացումը, որի տակ պետք է հասկանալ ոչ միայն նորագույն սպառազինության ձեռքբերում, այլև զինվորական համազգեստ կրող անձի արժեհամակարգի փոփոխություն, բարձր ինտելեկտ, պատասխանատվության զգացում, պետականամետ մտածողություն, ինչպես նաև հաղթանակի ու պարտության մասին առողջ պատկերացումներ», - ասաց նա։