ՏԵՍԱՆՅՈՒԹ․ Սոչիում անձրևների հետևանքով ջրի կրիտիկական մակարդակ է գրանցվել
Սոչիում փողոցները վերածվել են գետերի, որոնցով հնարավոր է տեղաշարժվել միայն նավակով կամ լողալով: Ուժգին հոսանքը քշում-տանում է անգամ մեքենաները։
Առողջարանային քաղաքում ջրհեղեղ է սկսվել առատ տեղումների պատճառով, որոնք սկսվել էին նախորդ օրը: Միանգամից մի քանի գետ դուրս է եկել ափերից: Նկուղներն ու շենքերի առաջին հարկերն անցել են ջրի տակ:
Հորդառատ անձրևների հետևանքով ջրի կրիտիկական մակարդակ է գրանցվել Սոչիի Խերոտա և Մացեստա գետերում, ինչի հետևանքով Կրասնոդարի երկրամասի օպերատիվ շտաբը բնակիչներին հորդորել է պատրաստվել հնարավոր տարհանմանը և հավաքել անհրաժեշտ իրերը:
Նշվում է, որ անհրաժեշտության դեպքում բնակչությանն օգնելու նպատակով հերթապահում են «Կուբան ՍՊԱՍ»-ի և «Սոչիի փրկարար ծառայության» անձնակազմերը:
Մի շարք գետերում ջրի մակարդակը բարձրացել է կրիտիկական մակարդակի, վնասվել է լողափի ենթակառուցվածքը, մի քանի պանսիոնատներ եւ հյուրանոցներ, որոշ փողոցներ հեղեղվել են: Լողափերը փակ են, լողալն արգելվում է, էքսկուրսիաները չեղյալ են հայտարարվել: Բնակիչներին խնդրում են պատրաստել փաստաթղթերն ու առաջին անհրաժեշտության իրերը՝ տարհանման դեպքի համար:
