Վարչապետի աշխատակազմը տեղյակ չէ՝ Նիկոլ Փաշինյանին սպասարկող կառավարական ինքնաթիռը երբ ՝է վերջին անգամ տեխզննում անցել. «Փաստինֆո»
ՀՀ վարչապետի աշխատակազմը տեղյակ չէ, թե Կառավարական թիվ մեկ ինքնաթիռը վերջին անգամ ե՞րբ է տեխնիկական զննում անցել, որի պատճառով աշխատանքային այցով Կազանում գտնվող ՀՀ պատվիրակությունը՝ Նիկոլ Փաշինյանի գլխավորությամբ, անհարմար իրավիճակում էր հայտնվել։ Թեմային անդրադարձել է «Փաստինֆո»-ն՝ նկատելով, թե այս հարցին պատասխանելու համար վարչապետի աշխատակազմը լրացուցիչ 30 օրյա ժամկետի կարիք ունի։
Մարտի 30-ին պաշտոնապես հայտարարվեց, որ Կազանում գտնվող վարչապետի պաշտոնակատար Նիկոլ Փաշինյանին սպասարկող ինքնաթիռում տեխնիկական անսարքություն է հայտնաբերվել, և նա Հայաստան է վերադարձել այլ ինքնաթիռով։ Մայիսի 4-ին կայքը գրավոր հարցում է ուղարկել ՀՀ կառավարություն, մասնավորապես աշխատակազմի ղեկավարին՝ խնդրելով տեղեկատվություն տրամադրել, թե որն է եղել կառավարական ինքնաթիռի խափանման պատճառը, երբ է այն վերջին անգամ տեխնիկական զննում անցել, ինչ ինքնաթիռով է Հայաստանի պատվիրակությունը վերադարձել Հայաստան՝ ռուսական կո՞ղմն է մեծահոգաբար տրամադրել, թե՞ վարձակալական հիմունքներով ինքնաթիռով է կազմակերպվել վերադարձը։
Կայքը նաև հետաքրքրվել է, թե մասնավոր ինքնաթիռի վարձակալությունը որքա՞ն է այն արժեցել և որքա՞ն գումար է անհրաժեշտ լինելու պետական ինքնաթիռի խափանումը կարգավորելու համար։
Մայիսի 11-ին միայն կայքին աշխատակազմը գրավոր նամակով տեղեկացրել է, որ հարցերին պատասխանելու համար հավելյալ 30 օրվա անհրաժեշտություն կա։
«Ի պատասխան Ձեր էլեկտրոնային գրության` տեղեկացնում ենք, որ Ձեր հարցման մեջ նշված տեղեկությունը տրամադրելու համար անհրաժեշտ է կատարել լրացուցիչ աշխատանք: Ուստի, համաձայն «Տեղեկատվության ազատության մասին» ՀՀ օրենքի հոդված 9-ի 7-րդ մասի 3) կետի` հարցերի պատասխանները կտրամադրվեն 30-օրյա ժամկետում»,- նշված է պաշտոնական նամակում։
