Հայտնի է, թե ինչու հայկական ռազմատեխնիկայի ցուցանմուշները չեն հասել Աբու Դաբի. նշանակվել է ծառայողական քննություն

IDEX-2021 միջազգային ռազմարդյունաբերական ցուցահանդեսում Հայաստանի մասնակցության, մասնավորապես՝  հայկական ընկերությունների  տաղավարում  ցուցանմուշների  բացակայության վերաբերյալ, ՀՀ բարձր տեխնոլոգիաների արդյունաբերության նախարարությունը տեղեկացնում է հետևյալը.

Ցուցանմուշների տեղափոխությունը կազմակերպվել է նախապես, այն հաշվարկով, որպեսզի սահմանված ժամկետում՝ մինչև ցուցահանդեսի բացումը, առաքանին տեղում լինի:

Առաջացած լոգիստիկ խնդիրների հետևանքով՝ հայկական ռազմական տեխնիկայի ցուցանմուշները չեն հասել Աբու Դաբի։

Տեղի ունեցածի հանգամանքները պարզելու նպատակով՝ նախարարի հրամանով սկսվում է  ծառայողական քննություն։

Չնայած առաջացած խնդիրներին,  հայկական ընկերություններն արդյունավետ աշխատում են  ցուցահանդեսում պատշաճ ներկայանալու համար. կապեր են հաստատում միջազգային գործընկերների հետ՝ բացահայտելով նոր հնարավորություններ և շուկաներ,  ուսումնասիրում են միջազգային փորձը ռազմական տեխնիկայի ոլորտում ։

Նշենք, որ ավելի վաղ տեղեկություններ էին տարածվել առ այն, որ փետրվարի 21-ին  Աբու Դաբիում բացված աշխարհի խոշորագույն ռազմական IDEX ցուցահանդեսին Հայաստանը չի ներկայացրել ռազմատեխնիկայի ցուցանմուշները, տաղավարը եղել է դատարկ, ներկայացված են եղել միայն բուկլետներ:

[3e7a51fc47c53a10b770d6b51259c456.jpg]

[064e5e184fe85674203941851e8fca69.jpg]