Պուտինի, Ալիևի և Փաշինյանի պայմանավորվածությունները թույլ կտան կարգավորել խաղաղ բնակիչների կյանքը Ղարաբաղում. Պետդումայի պատգամավոր

Ռուսաստանի, Ադրբեջանի և Հայաստանի ղեկավարներ Վլադիմիր Պուտինի, Իլհամ Ալիևի և Նիկոլ Փաշինյանի այսօրվա հանդիպման արդյունքում ձեռք բերված պայմանավորվածությունները թույլ կտան վերականգնել Լեռնային Ղարաբաղի բոլոր ենթակառուցվածքները և հունի մեջ գցել խաղաղ բնակիչների կյանքը: ТАСС գործակալության փոխանցմամբ՝ նման կարծիք է հայտնել ՌԴ Պետդումայի միջազգային հարցերով հանձնաժողովի նախագահ Լեոնիդ Սլուցկին:

«Մոսկվայում կայացած եռակողմ հանդիպման արդյունքներն ամրապնդում են անցյալ տարվա նոյեմբերի 9-ին ձեռք բերված արդյունքները տարածաշրջանում հրադադարի հաստատման վերաբերյալ: Նոր պայմանավորվածությունները թույլ կտան քայլ առ քայլ վերականգնել ողջ ենթակառուցվածքը և կարգավորել խաղաղ բնակիչների կյանքը»,- ասել է Սլուցկին:

Նրա խոսքով՝ Լեռնային Ղարաբաղի հակամարտությունը, որն արդեն 30 տարի է, ինչ շարունակվում է, պատմություն է դառնում, իսկ նրա հողում կայուն խաղաղություն է հաստատվում: «Եվ դրանում մեծ է Ռուսաստանի դերը՝ որպես արդյունավետ միջնորդի: Այդ փաստն ընդունում է ինչպես ադրբեջանական, այնպես էլ հայկական կողմը»,- ընդգծել է Սլուցկին:

Պատգամավորը հավելել է, որ Ռուսաստանը կշարունակի աջակցել Լեռնային Ղարաբաղում իրավիճակի կարգավորմանը, իսկ ռուս խաղաղապահները այսուհետ ևս կպաշտպանեն խաղաղությունը տարածաշրջանում:

Հիշեցնենք, որ Պուտինի, Ալիևի և Փաշինյանի եռակողմ հանդիպումը կայացել է այսօր, որի արդյունքում պայմանավորվածություն է ձեռք բերել տնտեսական ուղիների բացման նպատակով աշխատանքային խումբ ստեղծելու վերաբերյալ, որը մարտի մեկին երկրների ղեկավարներին կներկայացնի տարածաշրջանում ենթակառուցվածքների զարգացման ծրագիրը: