ԼՀԿ-ն Նիկոլ Փաշինյանին չի հանդիպի. Գևորգ Գորգիսյան
Ես չգիտեմ, թե մամուլը որտեղից է նման անհեթեթությունները վերցնում: Այս մասին լրագրողների հետ զրույցում հայտարարել է Գևորգ Գորգիսյանը՝ խոսելով տեղեկությունների մասին, որ Նիկոլ Փաշինյանը հանդիպելու է ԼՀԿ-ի հետ:
Գորգիսյանը հայտնեց, որ իրենց օրակարգում հիմա արտահերթ ընտրությունների հարցը չկա, Նիկոլ Փաշինյանի հրաժարական են պահանջում, ինչից հետո կձևավորվի նոր կառավարություն, երկիրը կկայունացվի, որից հետո կլինեն ընտրություններ:
ԼՀԿ-ական պատգամավորի խոսքերով, այն քաոտիկ վիճակում, որը հիմա կա, արտահերթ ընտրությունները վտանգավոր են երկրի, պետականության համար. «Այն, ինչ մենք տեսանք ԱԺ-ի մոտ, կարող ենք տեսնել ամեն գյուղում, համայնքում: Դա անվերահսկելի կլինի»:
Գորգիսյանը նշեց, եթե Փաշինյանն առաջարկի քննարկել իր հրաժարականի ու իշխանության անցնցում փոխանցելու հարցը, կքննարկեն, սակայն նման առաջարկ չի եղել, իսկ խորհրդարանական ընտրությունների վերաբերյալ հարցը քննարկելու առաջարկը մերժվել է:
