Թող բոլոր լրատվականները մոռանան իմ հեռախոսահամարը. թուրքն իր ցուցանակն է դրել Սյունիքում, ձեր նյութերն էլ օգուտ չտվեցին. Որոտանի համայնքապետ

Թող բոլոր լրատվականները մոռանան իմ հեռախոսահամարը, երևաց, որ ձեր լուրերն էլ ոչ մի օգուտ չտվեցին: Այս մասին Auroranews- ին ասաց Որոտան համայնքի համայնքապետ Սուրեն Օհանջանյանը: Պարոն Օհանջանյանից ցանկանում էինք ճշտել, թե այս պահին ինչ վիճակում են  այն տարածքի բնակիչները, որոնց ազերիները 1 ժամ էին տվել հեռանալու համար: 

«Թուրքն եկել, արդեն իր ցուցանակն է դրել Սյունիքում..Էլ ինձնից ի՞նչ եք ուզում լսել: Ձեր նյութերն էլ օգուտ չտվեցին՝ տեսեք, թե ինչ է կատարվում Սյունիքում»: 

Ավելի վաղ համացանցում տեղեկություն էր տարածվել, որ Ադրբեջանը 1 ժամ ժամանակ է տվել Որոտանի` իրենց տիրապետությանը հանձնված նոր տարածքները ազատելու համար: Auroranews- ը տեղեկության իսկությունը ճշտելու նպատակով զրուցեց Որոտանի համայնքապետ Սուրեն Օհանջանյանի հետ: 

«Ազերիներն եկել են տեղում գործող Այգերգործական ընկությանը պատկանող տարածք և մեկ ժամ ժամանակ են տվել այդտեղից դուրս գալու համար: Այս պահին այդ հատվածում են: Տարածքում հիմնականում մշակելի հողատարածքներ են, կա 15 շինություն», - նշեց  Օհանջանյանը: 

Հարցին, թե  ի՞նչ տրամադրություններ են Որոտանում, մարդիկ վախեցած են, պատասխանեց. «Մարտական ենք տրամադրված: Որոտանի բնակիչներից որևէ մեկն այստեղից դուրս չի եկել»:

Հետաքրքրվեցին՝ տարածքն անվտանգ է բնակիչների համար, նշեց, որ չի կարող ասել. «Որևէ մեկը չի կարող ասել, որ անվտանգ է, բայց խաղաղապահները կանգնած են»: