Ստեփանակերտում կատարվում են կանաչ գոտու վերականգնման աշխատանքներ
Ստեփանակերտի քաղաքապետարանի ֆեյսբուքյան էջը տեղեկացնում է.
«Մայրաքաղաքում կանաչ գոտու պահապաններն էլ են արդեն գործի անցել: Ակադեմիկոս Թախթաջյանի անվան «Ստեփանակերտի բուսաբանական այգի» ՓԲԸ աշխատակիցները հետպատերազմյան առաջին օրերից ձեռնամուխ են եղել քաղաքի մաքրման, ծառերի՝ հրետակոծությունից վնասված ճյուղերի հատման աշխատանքներին: Հետո ընդհանուր ծառաֆոնդի երիտասարդացման ու ձևավորման միջոցառումներն են իրականացրել: Այսօր մայրաքաղաքի ծաղկանոցների ու կանաչապատման համար նախատեսված տարածքներն են փխրեցնում, նախապատրաստում տունկին: Զուգահեռ ջերմոցներում սերմերն են հողին պահ տալիս, որ, ըստ ժամանակացույցի, ծաղիկների սածիլները պատրաստ լինեն՝ Ստեփանակերտի տարբեր հատվածներում տնկելու համար:
Ի դեպ, Բուսաբանական այգու աշխատակազմը վերջին օրերին համալրվել է նաև մեր տարհանված հայրենակիցներով»:
