Իրանը դատապարտել է Թուրքիայի դեմ Ամերիկայի սահմանած պատժամիջոցները
Իրանի իշխանությունները վճռականորեն դատապարտում են ԱՄՆ-ի կողմից Թուրքիայի դեմ սահմանված պատժամիջոցները ռուսական Ս-400 զենիթահրթիռային համակարգերի ձեռքբերման պատճառով: Այս մասին հայտարարել է Իրանի ԱԳՆ Մոհամմադ Ջավադ Զարիֆը, հայտնում է ТАСС-ը։
«Պատժամիջոցների նկատմամբ ԱՄՆ-ի հակվածությունն ու միջազգային իրավունքի նկատմամբ անհարգալից վերաբերմունքը կրկին լիարժեք կերպով ցուցադրվեցին։ Մենք վճռականորեն դատապարտում ենք Թուրքիայի դեմ ԱՄՆ-ի վերջին պատժամիջոցները»,- Twitter-ի իր էջում գրել է արտգործնախարարը։
Հիշեցնենք՝ նախօրեին ԱՄՆ-ը պատժամիջոցներ էր սահմանել Թուրքիայի պաշտպանական արդյունաբերության մարմնի (SSB) նկատմամբ` համաձայն «Պատժամիջոցների միջոցով Ամերիկայի հակառակորդներին հակահարված տալու մասին» օրենքի (CAATSA) 231-րդ հոդվածի՝ «Ռոսօբորոնէքսպորտ»-ի հետ С-400 ԶՀՀ գնելու խոշոր գործարքին գիտակցաբար մասնակցելու համար:
Պատժամիջոցները ներառում են SSB-ի համար ԱՄՆ արտահանման բոլոր լիցենզիաների և թույլտվությունների արգելք, ակտիվները կսառեցվեն, իսկ վիզայի սահմանափակումները կսահմանվեն տարածաշրջանի ղեկավար Իսմայիլ Դեմիրի և SSB-ի 3 այլ աշխատակցի նկատմամբ:
«Միացյալ Նահանգները լիովին պահպանում է CAATSA-ի 231-րդ հոդվածը և չի հանդուրժի ռուսական պաշտպանական և հետախուզական գործակալությունների հետ խոշոր գործարքներ: Ես նաև կոչ եմ անում Թուրքիային անհապաղ լուծել С-400-ի խնդիրը` համաձայնեցնելով ԱՄՆ-ի հետ: Թուրքիան ԱՄՆ-ի գնահատված դաշնակիցն է և տարածաշրջանային անվտանգության ապահովման կարևոր գործընկերը, և մենք ձգտում ենք շարունակել պաշտպանական ոլորտում արդյունավետ համագործակցության մեր երկար պատմությունը` հնարավորինս շուտ վերացնելով խոչընդոտը՝ Թուրքիայի զինուժում С-400-ների առկայության տեսքով»,- ասված էր նախօրեին ԱՄՆ պետքարտուղար Մայք Փոմփեոյի հայտարարության մեջ:
