Դդմաշենից մինչև Վրաստանի սահման էլեկտրահաղորդման գիծ կկառուցվի, իսկ սահմանին՝ փոխակերպիչ կայան. Հակոբ Վարդանյան

ԱԺ-ն 72 կողմ ձայնով հավանության արժանացրեց «Կովկասյան էլեկտրահաղորդման ցանց I - Հայաստան-Վրաստան հաղորդիչ գիծ/ենթակայաններ» վարկային համաձայնագրի մասհանումների ժամկետի երկարաձգում և հետվճարման փոփոխված ժամանակացույց» նամակ-համաձայնագիրը վավերացնելու մասին նախագիծը:

Հարցը ներկայացրեց տարածքային կառավարման և ենթակառուցվածքների նախարարի տեղակալ Հակոբ Վարդանյանը: Նա տեղեկացրեց, որ նախագիծը վերաբերում է Հայաստան-Վրաստան էլեկտրական զուգահեռ կապի վարկային համաձայնագրի 75 միլիոն եվրո արժողությամբ մեկ վարկային կտորին:

«Վարկային համաձայնագրով նախատեսված է կառուցել Դդմաշենից մինչև Վրաստանի սահման էլեկտրահաղորդման գիծ: Դդմաշենում՝ ենթակայան՝ 400-220 կ/վոլտ լարման և Այրումում՝ Հայաստան-Վրաստան սահմանին փոխակերպիչ կայան, որը հնարավորություն կտա Հայաստանի էներգահամակարգին զուգահեռ աշխատանք ապահովել և՛ Իրանի, և՛ Վրաստանի ու Ռուսաստանի հետ միաժամանակ:

Սա նախ անվտանգային խնդիր է լուծում: Մեր համակարգն այս պահին միայն սինքրոն կապով կապված է Իրանի հետ, և հայկական ու իրանական էներգահամակարգերի միջև ցանկացած ցնցում կբերի ծանր հետևանքների: Այն նաև հնարավորություն կտա էլեկտրաէներգետիկական շուկայի ազատականացման համար»,- նշեց Վարդանյանը:

Նախարարի տեղակալը նաև հայտնեց՝ կառուցվում է Իրան-Հայաստան երրորդ էլեկտրահողորդման գիծը, որի աշխատելու համար խիստ անհրաժեշտ է Դդմաշենի ենթակայանի կառուցումը, չլինելու պարագայում գիծը գործարկել հնարավոր չի լինի:

Ժամկետները խիստ են: Մինչև նոյեմբերի 30-ը ծրագրի մասհանումների ժամկետը չերկարացնելու դեպքում մոտ 16 միլիոն եվրոյի չափով տուգանք է նախատեսվում: Ծրագրի ընդհանուր արժեքն այս պահին գնահատված է 188.2 միլիոն եվրո: