Եթե պարզ դառնա, որ Թուրքիայի աջակցությունը վայելող Ադրբեջանը ոչ մի դեպքում չի գնալու բանակցությունների ճանապարհով, ապա այդ դեպքում, բնականաբար, Հայաստանը կճանաչի Ղարաբաղի անկախությունը, ռուսական «Коммерсантъ» պարբերականին տված հարցազրույցում հայտարարել է ՀՀ նախագահ Արմեն Սարգսյանը: 

Коммерсантъ - Վաղուց քննարկվում է Հայաստանի կողմից Լեռնային Ղարաբաղի Հանրապետության անկախությունը ճանաչելու հնարավորությունը: Ի՞նչ պայմաններում կարող է դա տեղի ունենալ: 

Արմեն Սարգսյան - Սա և՛ պարզ, և՛ բարդ հարց է միաժամանակ: ԽՍՀՄ-ի վերջին օրերին, երբ ԼՂ ժողովուրդը հանրաքվեով հայտարարեց ազատ ապրելու և իր կյանքը, պատմությունը, ժառանգությունն ու մշակույթը տնօրինելու ցանկության վերաբերյալ, Հայաստանի Գերագույն խորհուրդը կողմ քվեարկեց դրան: Բայց հետո գործընթացը կասեցվեց: Հայկական կողմը հայտարարեց. «Որպեսզի գործընթացը չբարդանա, մենք կասեցնում ենք Լեռնային Ղարաբաղի անկախության ճանաչումը, կխոսենք և վերջնարդյունքում կպայմանավորվենք Լեռնային Ղարաբաղի վերջնական կարգավիճակի վերաբերյալ»: Այսինքն, Հայաստանի կողմից ԼՂ անկախությունը չճանաչելը կապված է միայն նրա հետ, որ հայկական կողմը ցանկանում է հարցը կարգավորել խաղաղ բանակցությունների միջոցով: Սա մի թունել է, եւ եթե այդ թունելի վերջում լույս է երևում՝ Լեռնային Ղարաբաղի հիմնախնդրի վերջնական ու խաղաղ կարգավորման լույսը, ապա մենք կարող ենք էլի սպասել: Իսկ եթե լույս չկա, այսինքն՝ եթե պարզ դառնա, որ Թուրքիայի աջակցությունը վայելող Ադրբեջանը ոչ մի դեպքում չի գնալու բանակցությունների ճանապարհով, Հայաստանը կճանաչի Ղարաբաղի անկախությունը, 

Коммерсантъ -Այսինքն՝ դեռ լույս կա՞: 

Արմեն Սարգսյան - Ես պատրաստ եմ անել ինձնից կախված ամեն բան, որպեսզի հրադադարի հաստատման գործընթացի սկսվի: Մոսկվայում ձեռք բերված պայմանավորվածությունները կարող են սկսել գործել, եթե երկու կողմն էլ ցանկանա, որ դրանք աշխատեն: Կարիք չկա ապացուցելու, որ հայկական կողմը պատրաստ է գնալ այդ ճանապարհով: Եվ եթե ադրբեջանական կողմը հայտարարի, որ իրենց պատրաստ են հրադադարի և պատրաստ են շարունակել բանակցությունները, ապա հույս կլինի: Ես շատ կցանկանայի, որ թունելի վերջում լույսը չմարեր: Հակառակ դեպքում՝ Աստված օգնական բոլորին, որովհետև այդ ժամանակ պատերազմը կարող է լրիվ այլ պատերազմի վերածվել: Մոտավորապես այնպիսին, ինչպիսին՝ Սիրիայում: Դա շատ ավելի ողբերգական ու լայնամասշտաբ պատերազմ կլինի: 

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։ 

Հոկտեմբերի 18-ի դրությամբ Արցախի զինուժը խոցել է հակառակորդի՝ 16 ուղղաթիռ, 22 ինքնաթիռ, 186 անօդաչու թռչող սարք, 554 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ: 

Հակառակորդն ունի ավելի քան 6109 զոհ։ Հայկական կողմից, նախնական տվյալներով, կա 673 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 36 քաղաքացիական անձ, վիրավորվել է 115 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ: 

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ 

Հայաստանում և Արցախում սեպտեմբերի 27-ին հայտարարվել է ռազմական դրություն։ 

Արդեն երկու անգամ հայտարարվել է մարդասիրական հրադադարի մասին, սակայն ադրբեջանական զինուժը դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։