Ֆրանսիայի ԱԳ նախարարի նախազգուշացումը՝ ԼՂ հակամարտության միջազգայնացման վտանգի մասին

Ֆրանսիայի արտգործնախարար Ժան Իվ Լը Դրիանը Հայաստանի և Ադրբեջանի արտգործնախարարներին նախազգուշացրել է ԼՂ հակամարտության միջազգայնացման վտանգի մասին:

Այս մասին տեղեկացնում է ՏԱՍՍ գործակալությունը:

Ֆրանսիայի արտաքին քաղաքական գերատեսչության ղեկավարը հավելել է, որ ԵԱՀԿ-ն մտադիր է Լեռնային Ղարաբաղում մարտերի դադարեցման և բանակցային գործընթացի վերսկսման  հասնել:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Արցախի զինուժը խոցել է հակառակորդի 11 ուղղաթիռ, 6 ինքնաթիռ (4-ը Սու–25), 103 անօդաչու թռչող սարք, 184 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 2 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 1280 զոհ, որից 180–ը Քարվաճառի ուղղությամբ, ավելի քան 2700 վիրավոր։ Հայկական կողմից, նախնական տվյալներով, կա 158 զոհ և 200-ից ավելի վիրավոր։

Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում՝ 11 մարդ։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։