Խաշթառակի դեպքը վերջին շրջանի մեր ամենացավալի իրադարձություններից էր, լրագրողների հետ զրույցում ասաց Տավուշի մարզպետ Հայկ Չոբանյանը։

«Խոսքը վերաբերում է  երեխաների պաշտպանության ինստիտուտին, ու այս ինստիտուտի աշխատունակությանը։ Մեր նախնական եզրակացությունները հետևյալն են՝ գործող օրենսդրությունն ու մեխանիզմները, ցավոք սրտի, լիարժեք չեն ապահովագրում մեր երեխաների ու մեր ընտանիքների անվտանգությունը, պետք է իրականացվեն փոփոխություններ»,-նշեց մարզպետը։

Նա ասաց, թե խնամատարության ինստիտուտները ոչ այնքան հետևողական են իրենց գործողությունների մեջ։

«Եթե խնամատարության մարմիններն ավելի խստապահանջ լինեին, կարող էին ավելի շուտ արձագանքել դեպքին»,-ասաց Չոբանյանն՝ ավելացնելով, որ մարզպետարանը ոչ մի անգամ որևէ ահազանգ չի ստացել բռնության դեպքի վերաբերյալ։

Խաշթառակ գյուղում 58-ամյա տղամարդը դաժան ծեծի էր ենթարկել իր 4 և 6-ամյա թոռներին: 6-ամյա երեխան մահացել էր օգոստոսի 25-ին։

Խաշթառակ համայնքի 57-ամյա բնակիչը, 2014թ. ծնված անչափահաս թոռան առողջությանը ծանր վնաս պատճառելու դիտավորությամբ, ձեռքերով, ոտքերով և փայտով բազմաթիվ հարվածներ է հասցրել վերջինիս մարմնի տարբեր մասերին, որի հետևանքով 6-ամյա երեխան վայր է ընկել, գլխով հարվածել է բազմոցի ոտնակին, ստացել  կյանքի համար վտանգավոր բազմաթիվ մարմնական վնասվածքներ և անգիտակից վիճակում տեղափոխվել  հիվանդանոց:

2020թ. օգոստոսի 14-ին, 16-ին պապը պարբերաբար, դիտավորությամբ ձեռքերով և ոտքերով բազմաթիվ հարվածներ է հասցրել իր 2 անչափահաս  թոռների մարմնի տարբեր մասերին՝ վերջիններիս պատճառելով ֆիզիկական ուժեղ ցավ և հոգեկան ուժեղ տառապանք:
Օգոստոսի 19-ին նույն ընտանիքի ևս 5 երեխա թունավորմամբ տեղափոխվել էր Երևանի «Մուրացան» հիվանդանոց։ Երեխաների մայրը` 28-ամյա Մարիաննա Հ.-ն, նույնպես բերման էր ենթարկվել։

Քննությամբ ձեռք բերված տվյալների համաձայն՝ 28-ամյա Մարիաննա Հ.-ն նույնպես պարբերաբար, դիտավորությամբ ձեռքերով, ոտքերով, փայտով և այլ առարկաներով բազմաթիվ հարվածներ է հասցրել  իր 5 անչափահաս երեխաների, ինչպես նաև՝ համատեղ բնակվող եղբոր 2 անչափահաս որդիների մարմնի տարբեր մասերին՝ վերջիններիս պատճառելով ֆիզիկական ուժեղ ցավ և հոգեկան ուժեղ տառապանք:

Տղամարդուն մեղադրանք է առաջադրվել՝ ՀՀ ՔՕ 112-րդ հոդվածի (դիտավորությամբ առողջությանը ծանր վնաս պատճառելը) 1-ին մասով և Քրեական օրենսգրքի 119րդ հոդվածի (ֆիզիկական ուժեղ ցավ կամ հոգեկան ուժեղ տառապանք պատճառելը)  2-րդ մասի 1-ին և 3-րդ կետերով, վերջինս կալանավորվել է:

Նրա 28-ամյա դստերը մեղադրանք է առաջադրվել՝ ՀՀ ՔՕ 119-րդ հոդվածի 2-րդ մասի 1-ին և 3-րդ կետերով։

Օգոստոսի 8-ին մահացել է երեխաների մայրը։