Խաղաղ կարգավորմանն այլընտրանք չկա. Մնացականյանի հարցազրույցը իսպանական EFE պարբերականին

ՀՀ Արտաքին գործերի նախարարությունը տարածել է ԱԳ նախարար Զոհրաբ Մնացականյանի հարցազրույցը իսպանական EFE պարբերականին: 

«Տարածաշրջանային կայունության համար լավագույնը կլիներ ամրապնդել 1994թ.–ից գործող հրադադարի ռեժիմը՝ վերահսկողության մեխանիզմներով, որոնց շնորհիվ հնարավոր կլիներ խուսափել էսկալացիայից և նշել հրադադարի խախտման պատասխանատու կողմին: Սակայն Բաքուն միշտ խուսափում է դրանից:

Խաղաղ կարգավորմանն այլընտրանք չկա: Մենք լիովին պատրաստ ենք շարունակելու դրանք հնարավորինս շուտ:

Վերոնշյալի առնչությամբ Հայաստանն ունի երկու առաջնայնություն՝ Լեռնային Ղարաբաղի՝ առանց սահմանափակումների ինքնորոշման իրավունքի ճանաչում և անվտանգության համաձայնագրեր, որոնք կկանխարգելեն ռազմական գործողությունների վերսկսումը:

Մինչ Թուրքիան ասում է, որ ցանկանում է զրո խնդիր հարևանների հետ, իրականում իր բոլոր հարևանների համար հանդիսանում է անկայունության և ագրեսիվության աղբյուր, և փորձ է արվում այդ քաղաքականությունն արտահանել Հարավային Կովկաս: Մենք չենք կարող անտարբեր մնալ դրան»,- ասել է ԱԳ նախարարը: