Քիչ անց գործադիրի արտահերթ նիստ կանցկացնի. կերկարացվի՞ արդյոք արտակարգ դրությունը

Այսօր՝ ժամը 12:00-ին, տեղի է ունենալու Կառավարության արտահերթ նիստ: Գործադիրը մտադիր է կորոնավիրուսի տարածումը կանխարգելելու համար 30 օրով երկարաձգել արտակարգ դրությունը: Դրանից հետո, Սահմանադրության համաձայն, պետք է գումարվի ԱԺ հատուկ նիստ:

Այսօր Կառավարությունը կհաստատի նաև կորոնավիրուսի տնտեսական հետևանքների չեզոքացման 11-րդ միջոցառումը։
Կառավարության կայքում նշված է, որ կորոնավիրուսի տնտեսական հետևանքների չեզոքացման 11-րդ միջոցառման (այսուհետ՝ Միջոցառում) նպատակն է օժանդակել կորոնավիրուսի տարածման հետևանքով գոյացած դժվարությունների արդյունքում սոցիալական խնդիրների առջև կանգնած մի խումբ անձանց:

Միջոցառման շահառու են բնական գազի մատակարարման և էլեկտրական էներգիայի մատակարարման պայմանագիր կնքած այն բնակիչ բաժանորդները, որոնց 2020 թվականի փետրվար ամսվա ծախսը չի գերազանցել ՝
1) բնական գազի սպառման գծով՝ 10 000 ՀՀ դրամը,
2) էլեկտրական էներգիայի սպառման գծով 5 000 ՀՀ դրամը:

Աջակցությունը տրամադրվում է սույն Միջոցառման 2-րդ կետով նախատեսված յուրաքանչյուր բաժանորդի կողմից 2020 թվականի փետրվար ամսվա ընթացքում սպառված՝ համապատասխանաբար բնական գազի և էլեկտրական էներգիայի դիմաց վճարի 50% -ի չափով: