Իտալիայի վարչապետ Ջուզեպպե Կոնտեն հայտարարել է կորոնավիրուսի պատճառով կարանտինային միջոցառումները ողջ երկրով մեկ ընդլայնելու մասին։ Դրանք ուժի մեջ կմտնեն այսօր առավոտյան։ Ինչպես հայտնում է ANSA գործակալությունը, ռեստորանների և բարերի աշխատանքային ժամերը կրճատվում են, դրանք կփակվեն 18․00-ին, իսկ ցերեկային ժամերին դրանց աշխատանքը հնարավոր է միայն այցելուների միջև հեռավորություն ապահովելու դեպքում։

Դպրոցներում ու համալսարաններում դասերը դադարեցված են մինչև ապրիլի 3-ը։

Փակ են կինոթատրոնները, թատրոնները, թանգարաններն ու մարզասրահները, արգելված են բոլոր տեսակի միջոցառումներն ու արարողությունները՝ հարսանեկան, հուղարկավորման, եկեղեցական։

Նշենք, որ Իտալիայում նոր տեսակի կորոնավիրուսով պայմանավորված հիվանդությունից մահացության դեպքերը մեկ օրում ավելացել են 97-ով, մահացածների ընդհանուր թիվը հասել է 463-ի:

Վարակակիրների թիվն Իտալիայում հասել է 9172-ի: Բորելին նշել է, որ 724 մարդ ապաքինվել է: