2020-ի հունվարին որոշել ենք մեծ համաժողով կազմակերպել եւ ներկայացնել խմբակցության հաշվետվությունը: Այս մասին ֆեյսբուքյան իր էջում ուղիղ եթերում նշեց «Լուսավոր Հայաստան» խմբակցության ղեկավար Էդմոն Մարուքյանը` ամփոփելով խմբակցության աշխատանքները:

Նրա խոսքով, որպես ամենափոքր խմբակցություն «Լուսավոր Հայաստանը» շրջանառության մեջ է դրել մեկ տարվա ընթացքում 66 օրենքի նախագիծ, որից 15-ը ընդունվել է:

«Խորհրդարանի ռեսուրսներ շատ քիչ են, թույլ են` խորհրդարանական վերահսկողություն իրականացնելու տեսանկյունից եւ մյուս խմբակցությունների համեմատ նախաձեռնողականությամբ ԼՀԿ-ն առաջին տեղում է գտնվում»,-ասաց Մարուքյանը:

«Մեկ տարվա ընթացքում ԼՀԿ խմբակցությունը երկու անգամ ներկայացրել է Կառավարության առանձին վերցրած անդամի անվստահության հարց, առաջին դեպքում Ֆինանսների նախարարությանն ենք ներկայացրել, երկրորդ դեպքում շրջակա միջավայրի նախարարին: Երկու պարագայում էր կառավարությունը այդ նախարարների հետագա պաշտոնավարման հարցը չի քննարկել»,-ասաց նա:

Էդմոն Մարուքյանը նշեց, որ պետական բյուջեի նախագծի վերաբերյալ 151 առաջարկություն են ներկայացրել, որոնք բոլորը մերժվել են եւ իրենք դեմ են քվեարկել բյուջեի նախագծին:

ԼՀԿ խմբակցության ղեկավարը հիշեցրեց, որ իրենք առաջարկել են կառավարության կառուցվածքի փոփոխություն, որը եւս չի ընդունվել, եւ որի պատճառով այսօր կան խնդիրներ, մասնավորապես, ԱԱԾ-ն եւ ոստիկանությունը ղեկավարում են պաշտոնակատարները:

Պատգամավորը հայտնեց, որ 2020 թվականին սահմանադրաիրավական հարցերին վերաբերող ծրագրեր ունեն եւ ըստ նրա շատ «սահմանադրական» տարի է լինելու: «Շատ դժվար է հեղափոխությունից հետո լինել ընդդիմություն  եւ լինել լեգիտիմ իշխանության ընդդիմություն, բայց մենք հնարավորինս մեր ակտիվությունը ցուցաբերել ենք»,-ասաց նա:

Այնուհետեւ Մարուքյանն անդրադարձավ նախարարներին. «Իմ կարծիքով ամենալավ աշխատող նախարարությունը տարածքային կառավարման նախարարությունն է եւ նախարար Սուրեն Պապիկյանը: Ամենավատ աշխատող նախարարությունը բնապահպանության նախարարությունն է, նախարարը, որին վերջերս անվստահություն հայտնեցինք, բայց իշխանությունները չընդունեցին»,-ասաց Մարուքյանը: