Նպաստ ստացող ունենք, որ ամիսը 1 միլիոն դրամ վարկ է փակում. Փաշինյան

Կառավարության այսօրվա նիստի ժամանակ քննարկվող նախագծերից մեկով առաջարկվում է նպաստ ստանալու համակարգից հանել այն մարդկանց, որոնք ամսական 100 հազար դրամից ավելի վարկ են փակում։

«Նպաստ ստացող ունենք, որ ամիսը 1 միլիոն դրամ վարկ է փակում։ 1 միլիոն, 800 հազար, 500 հազար … Այսինքն` պետությունից որպես անապահով ակնկալում են 30 հազար դրամ ամիսը, բայց հետո ամիսը 700 հազար դրամ վարկ են փակում։ Ասենք, օրինակ` ավտոմեքենա է առել, «Բրաբուս» է առել ու վարկ է փակում»,- այս համատեքստում ասաց վարչապետ Նիկոլ Փաշինյանը։

Վարչապետն ասաց, որ արդեն 1 տարի խոսել են այս մասին, և դա լավ է, որպեսզի հանրությունը տեղյակ լինի փոփոխություններից։

Կառավարության այսօրվա նիստում ընդունվեց այդ նախագիծը։