Ալիկ Պետրոսյանի վերաբերյալ քրեական գործն ուղարկվել է դատարան

ԱԺ նախկին պատգամավոր, «ՄԱՊ»-ի Ալիկ անունով հայտնի Ալեքսան Պետրոսյանի մեղադրական եզրակացությունը հաստատվել է, եւ գործն ուղարկվել է դատարան։

Այս մասին «Հայկական ժամանակ»-ի հարցին ի պատասխան` տեղեկացրեց Դատախազության հանրային կապերի բաժնի պետ Արեւիկ Խաչատրյանը։

Վերջինս նշեց նաեւ, որ մերժվել է Պետրոսյանի խափանման միջոցը փոփոխելու վերաբերյալ պաշտպան Միհրան Պողոսյանի միջնորդությունը՝ անհիմն լինելու պատճառաբանությամբ:

Հիշեցնենք՝ Պետրոսյանը մեղադրվում է փողերի լվացմանն օժանդակելու համար. նա գտնվում է կալանքի տակ:

Երեկ մեր զրույցում նրա պաշտպան Միհրան Պողոսյանը մանրամասներ էր ներկայացրել քրեական գործից` տեղեկացնելով նաեւ, որ գրավի միջնորդություն է ներկայացրել դատարան։ Միհրան Պողոսյանը նշել էր, որ միաժամանակ բողոք են ներկայացրել Գլխավոր դատախազին՝  միջնորդելով մեղադրական եզրակացությունը հաստատելու պարագայում քննարկել Ալեքսան Պետրոսյանի խափանման միջոցի հարցը. «Միջնորդության մեջ նշել ենք, որ պետք չէ տուրք տալ ՀՔԾ անհիմն պնդումներին եւ գործ կատարելու իմիտացային, պետք է հանդես գալ որպես Գլխավոր դատախազություն եւ վերջիվերջո իրավական խոսք ասել»,-ասել էր պաշտպանը: