ՏԵՍԱՆՅՈՒԹ. 17-ամյա երիտասարդը թոշակառուի տնից գողացած բանկային քարտով գումար էր կանխիկացրել

Դեկտեմբերի 11-ին՝ ժամը 17․30-ի սահմաններում, Մեծամոր քաղաքի տարեց բնակչուհիներից մեկը ոստիկանության Մեծամորի բաժնում հաղորդում է տվել, որ հարմարեցված բանալիով բացել են իր բնակարանի դուռը և գողացել ննջասենյակի պահարանում դրված բանկային քարտն ու մեկ ամսվա թոշակը։ Բանկային քարտի հետ նաև ծածկագիրն էր եղել։ 

Քարտը գողացած անձը անմիջապես գումար էր կանխիկացրել։ Այս մասին տեղեկացնում է Ոստիկանությանը:

Բնակարանային գողության փաստով տարածքային նախաքննական մարմնում հարուցվել է քրեական գործ։ Ոստիկանության Մեծամորի բաժնի քրեական հետախույզները օպերատիվ միջոցառումների արդյունքում ստացած տեղեկությունների վերլուծությամբ փաստական տվյալներ են ձեռք բերել առ այն, որ թոշակառուի տան դուռը կրկնօրինակ բանալիով բացել և գողություն է արել Մեծամորի բնակիչ, 17-ամյա մի երիտասարդ։

Բացատրական աշխատանքի շնորհիվ կասկածվողը ներկայացել է ոստիկանության Մեծամորի բաժին։ Երիտասարդը ոստիկանությունից ներկայացվել է քննչական բաժին ու խոստովանել կատարածը։ Նրան մեղադրանք է առաջադրվել։ Հարուցված քրեական գործի նախաքննությունը շարունակվում է։