Աբովյանում նոր հատուկ կացարան կկառուցվի Հայաստանում ապաստան հայցող անձանց համար

Կոտայքի մարզում նախատեսվում է կառուցել Հայաստանում ապաստան հայցող անձանց համար նախատեսված նոր հատուկ կացարան։ Համապատասխան որոշումն ընդունել է Կառավարությունը։

Որոշմամբ՝ Աբովյան քաղաքի Շուշի թաղամաս 4 հասցեում գտնվող բնակելի կացարանը, կաթսայատունը և դրանց օգտագործման ու սպասարկման համար հատկացված 2 հա հողամասը անժամկետ և անհատույց օգտագործման իրավունքով ամրացվել են ՆԳՆ միգրացիայի և քաղաքացիության ծառայության «Հատուկ կացարան» ՊՈԱԿ-ին։

Գույքի՝ շուկայական արժեքին մոտարկված կադաստրային արժեքը կազմում է 313 մլն 219 հազար 658 դրամ։

Որոշման հիմնավորման համաձայն՝ տարածքում նախատեսվում է կառուցել Հայաստանում ապաստան հայցող անձանց համար նախատեսված՝ միջազգային չափանիշներին համապատասխան նոր հատուկ կացարան։