Ատելության խոսքի դեմ աշխատանքային խումբ ստեղծելու առաջարկն ընդունվեց միաձայն

Ֆեյք նյուզը, ատելության խոսքին զուգահեռ, պետք է դիտարկվի ոչ պակաս սպառնալիք, ԱԺ մարդու իրավունքների պաշտպանության և հանրային հարցերի մշտական հանձնաժողովի նիստի ժամանակ ասաց անկախ պատգամավոր Արման Բաբաջանյանը։ 

«Մեր պետությունը ներսից կրծում է ոչ միայն ատելության խոսքը, այլև ֆեյք նյուզը։ Դրանք զուգահեռ սպառնալիքներ են։ Ֆեյքնյուզի պատճառով պետության դիմադրողականությունը զգալի տուժում է», - ասաց նա։ 

Հանձնաժողովում հարցի քննարկումն ինչ-որ պահի վերածվեց տարակարծությունների արտահայտման։ Երբ «Իմ քայլը» խմբակցության պատգամավորները շեշտեցին, որ ատելության խոսքի դեմ պայքարող աշխատանքային խումբը պետք է պաշտպան դառնա հատկապես հասարակության խոցելի խմբերի համար, Նաիրա Զոհրաբյանը զարմացավ՝ ինչու այդ խմբում չպետք է լինեն քաղաքական գործիչները։ 

«Եթե աշխատանքային խմբի նպատակը կոնկրետ խոցելի խմբերին է վերաբերելու, «Բարգավաճ Հայաստան» խմբակցությունը պետք է քննարկի, թե ինչպես է քվեարկելու։ Մենք կարծում էինք՝ նպատակը բացարձակ այլ է՝ ատելության խոսքի կարգավորումն ընդհանարապես», - ասաց Զոհրաբյանը։ 

Ատելության խոսքի դեմ աշխատանքային խմբի առաջարկն ընդունվեց միաձայն։ Աշխատանքային խումբը կղեկավարի ԱԺ մարդու իրավունքների պաշտպանության և հանրային հարցերի մշտական հանձնաժողովի անդամ Սարգիս Խանդանայանը։