Ստացած ահազանգերը ուղղորդել են իրավապահ մարմիններին․ Բաթոյանը՝ ապօրինի որդեգրումների մասին

ՀՀ Աշխատանքի և սոցիալական հարցերի նախարար Զարուհի Բաթոյանն այսօր լրագրողների հետ զրույցում անդրադարձավ երեխաների ապօրինի որդեգրման դեպքերին։

Նա ընդգծեց, որ որդեգրման գործընթացը նախարարության տիրույթում չէ, բայց իրենք ստացած բողոքներն ու ահազանգերը ուղղորդել են իրավապահ մարմիններին․

«Այս պահին որևէ այլ լրացուցիչ տեղեկություններ չունեմ, մենք ընդամենը ահազանգերին կամ  ասեկոսեներին ընթացք ենք տվել»։

Բաթոյանի խոսքերով՝ ցանկացած խնդիր, որը իրենց  համար կասկածելի է թվացել, տրամադրել են  իրավապահ մարմիներին։

Թե ո՞վ է զբաղվել ապօրինի որդեգրումներով, նախարությանը հայտնի չէ, ասում է Բաթոյանն ու հավելում, որ  միջգերատեսչական խնդիր է․

«Այստեղ կապ ունեն և՛ կենսաբանական ծնողները, և՛ ծննդատները, և՛ բուժհաստատությունները, և՛ տեղական ինքնակառավարման մարմինները, դա մեծ համագործակցող ցանց է, որտեղ ցանկացած ոլորտում կարող է լինել խնդիր»։

Զարուհի Բաթոյանն ասաց, որ ուսումնասիրում են համակարգում առկա խնդիրները, որպեսզի քայլեր ձեռնարկեն ՝ օրենսդրական բացերը հասկանալու և լուծումներ գտնելու ուղղությամբ։