Որևէ գերատեսչության չի հրահանգվել գումար փոխանցել «Հայաստան» համահայկական հիմնադրամին․ Փաշինյան
ՀՀ վարչապետ Նիկոլ Փաշինյանն այսօր ԱԺ-ում հերքեց, որ որեւէ գերատեսչության հրահանգվել է գումար փոխանցել «Հայաստան» համահայկական հիմնադրամին: Այս մասին նա հայտարարեց՝ ի պատասխան ԼՀԿ խմբակցության պատգամավոր Մանե Թանդիլյանի հարցի։
Վերջինս հարց ու պատասխանի ժամանակ կառավարության անդամներից հետաքրքրվեց, թե արդյոք ոստիկանությանը, Կադաստրի կոմիտեին կամ Արտակարգ իրավիճակների նախարարությանը հրահանգվե՞լ է բյուջեի միջոցներից գումար փոխանցել հիմնադրամի հաշվեհամարին․
«Ինչի՞ հիման վրա են պետական որոշ կառույցներ պետբյուջեի միջոցները փոխանցում հիմնադրամին, կա՞ կառավարության որոշում, թե՞ դա տվյալ գերատեսչության ղեկավարի PR ակցիան է։
Խոսքը ոստիկանության, ԱԻՆ, Կադաստրի կոմիտեի փոխանցումների մասին է, ինչպե՞ս են նման որոշումներ կայացվում»,- հետաքրքրվեց Թանդիլյանը։ Այս հարցն, ի դեպ, զարմացրեց կառավարության ներկայացուցիչներին։ Խնդրեցին՝ գրավոր հարցում ուղարկել հանգամանալից պատասխանի համար։ Սակայն վարչապետ Փաշինյանն, այնուամենայնիվ, հարկ համարեց պատասխան հնչեցնել․
«Երեկ, օրինակ, ոստիկանության պետն ինձ ասել է, որ դրամահավաքի ժամանակ աշխատակիցները գումար են հավաքել, եւ փոխանցել են: Դա ինձ համար եղել է նորություն, եւ ես ուրիշ որեւէ մեկից այդպիսի տեղեկություն չունեմ, եւ որեւէ մեկին այդպիսի հրահանգ չի տրվել»,- ասաց Փաշինյանը:
Թանդիլյանը կասկածելի համարեց այն հանգամանքը, որ ոստիկանության աշխատակիցները կարող էին իրենց անձնական միջոցներից 19 մլն 500 դրամ նվիրաբերել հիմնադրամին: ՀՀ վարչապետ Նիկոլ Փաշինյանն էլ վերահաստատեց, որ իրենց կողմից այպիսի որեւէ հրահանգ չի տրվել:
