Չէի պատկերացնի, որ բազմամիլիարդանոց ներդրումներ անող մարդիկ այդքան նեղացկոտ են. Մարությանի խոսնակ

Ես չէի պատկերացնի, որ բազմամիլիարդանոց ներդրումներ անող մարդիկ այդքան նեղացկոտ են։ Այս մասին այսօր լրագրողների հետ հանդիպմանն ասաց քաղաքապետի մամուլի խոսնակ Հակոբ Կարապետյանն՝ ընդգծելով, որ երբ պաշտոնական հանդիպման ընթացքում զգուշացվում էր, որ չարժե անընդհատ հեռախոսով խոսել՝ դադարեցնում են բազմամիլիոնանոց նախագծի ծրագրի շուրջ բանակցությունները և հեռանում։

«Ընդ որում՝ դա ասվել է բավական մեղմ տոնով ու հանդիպման ավարտին էլ քաղաքապետն ասել է, որ քաղաքը պատրաստ է ընդունել իրենց ներդրումները։ Երբ որևէ երկիր ես գնում՝ պարտավոր ես հագնել այդ երկրի գլխարկը, կարծում եմ, պետք է հարգել պետական ինստիտուտները և հետևել քաղաքավարության կանոններին»։

Անդրադառնալով Հայաստանում բազմամիլիարդանոց շինարարությանը՝ նա նշեց, որ դժվար է պատկերացնել Երևանի կենտրոնում բազմամիլիարդանոց հիվանդանոց կամ հյուրանոց, որի վրա մի քանի միլիարդ է ծախսվում։

«Ի դեպ, ասվել է մի քանի միլիարդ, բայց արժույթը չի նշվել, միգուցե խոսքը ուրիշ արժույթի մասին է, ոչ թե դոլարի, այդ դեպքում հնարավոր է պատկերացնել մի քանի միլիարդի ներդրում»,-ասաց Կարապետյանը։