Մխիթարյանը կրկին բաց թողեց «Ռոմայի» խաղը. նա կխաղա մյուս խաղին

Հայաստանի ֆուտբոլի ազգային հավաքականի ավագ Հենրիխ Մխիթարյանի վերադարձը նորից հետաձգվեց: Կիսապաշտպանը հայտավորված չէր երեկ՝ նոյեմբերի 24-ին, տեղի ունեցած Ա Սերիայի 13-րդ տուրի «Բրեշիայի» դեմ տնային խաղին, որը նրա թիմը հաղթեց 3:0 հաշվով: Հանդիպումից հետո «գայլերի» գլխավոր մարզիչ Պաուլո Ֆոնսեկան խոսել է նրա բացակայության մասին: 

«Նա շաբաթվա սկզբից մարզվում էր մեզ հետ: Սա նրա ապաքինման 8-րդ շաբաթն է: Հաջորդ խաղում նա մեզ հետ կլինի, թեեւ պետք է շարունակի բարելավել»,- ասել է մարզիչը: 

Մխիթարյանն աճուկային վնասվածք էր ստացել սեպտեմբերի 29-ին կայացած Ա Սերիայի 6-րդ տուրի «Լեչեի» դեմ խաղում: Սպասվում էր, որ կվերադառնա 3 շաբաթից, սակայն ապաքինումը ձգձգվեց: Նա բաց թողեց ինչպես ՀՀ ֆուտբոլի ազգային հավաքականի, այնպես էլ «Ռոմայի» մի շարք հանդիպումներ: 

Հռոմեական թիմի հաջորդ խաղը հինգշաբթի օրն է՝ նոյեմբերի 28-ին: Եվրոպա լիգայի 2019-20 մրցաշրջանի խմբային փուլի 5-րդ տուրի շրջանակներում կհյուրընկալվի «Իստամբուլ Բաշաքշեհիրին»: Խմբային փուլի ավարտից 2 տուր առաջ հենց թուրքական թիմն է գլխավորում J խմբի մրցաշարային աղյուսակը: Ունի 7 միավոր: Ռոման 5 միավորով 3-րդն է: Նույնքան միավոր ունեցող Մյունխենգլադբախի «Բորուսիան» 2-րդն է, իտալական թիմին գերազանցում է լրացուցիչ ցուցանիշներով: «Վոլֆսբերգերը» 4 միավորով եզրափակում է մրցաշարային աղյուսակը: