175 մլն դրամանոց դռան փեղկ․ Հայկ Դեմոյանը դիմում է իրավապահներին

Ցեղասպանության թանգարան-ինստիտուտի նախկին տնօրեն Հայկ Դեմոյանը հայտարարել է, որ «դռան փեղկի» ձեռքբերման գործընթացի վերաբերյալ հաղորդում է ներկայացնելու ՀՀ իրավապահ մարմիններին։

Դեմոյանը ֆեյսբուքյան իր էջում գրել է, որ իր հայտարարությունը հիմնված է երկու հիմնական հարցի վրա՝ ցուցանմուշի գիտական հիմնավորման և դրա գնման գործընթացի  իրավական գնահատման։

Նրա խոսքով՝ 2025 թվականի դեկտեմբերին Հայաստանի կառավարությունը պետական բյուջեի պահուստային ֆոնդից 175 մլն 360 հազար դրամ է հատկացրել Լոնդոնի աճուրդից հայկական մշակութային արժեք համարվող դռան փեղկը ձեռք բերելու համար։

Դեմոյանը պնդում է, որ ցուցանմուշի հայկական ծագումը բավարար չափով հիմնավորված չէ։ Նա նշել է, որ դռան փեղկի վրա չկա հայերեն արձանագրություն, որը, ըստ նրա, կարող էր հաստատել դրա ծագումն ու թվագրումը։

Նա նաև կասկածի տակ է դրել ցուցանմուշի արժեքը՝ նշելով, որ նման իրերի համար վճարված գումարը, իր գնահատմամբ, չափազանց բարձր է և չի համապատասխանում միջազգային աճուրդներում նմանատիպ նմուշների գներին։

Դեմոյանը պահանջում է պարզել՝ ինչ փաստաթղթերի հիման վրա է հաստատվել դռան փեղկի հայկականությունը, ինչ փորձագիտական ուսումնասիրություններ են իրականացվել, ինչպես է որոշվել գինը և ինչ պայմաններով է իրականացվել գործարքը։

Նա նաև գրել է, որ իրավապահ մարմիններին կներկայացնի պահանջ՝ ուսումնասիրելու գործարքի բոլոր հանգամանքները՝ ներառյալ աճուրդի տան հետ բանակցությունները, փորձագիտական եզրակացությունները և ցուցանմուշի ծագման վերաբերյալ փաստաթղթերը։

Դեմոյանը հավելել է, որ պատրաստ է ներկայացնել իր մասնագիտական գնահատականը և մասնակցել հրապարակային քննարկման՝ ցուցանմուշի պատմականության և ծագման վերաբերյալ։

Նշենք, որ Դեմոյանի հայտարարությունները նրա գնահատականներն ու պնդումներն են։ Պաշտոնական մարմինները դեռ չեն արձագանքել դրանց։